Nur-Sultandaǵy koronavırýs juqtyrǵan 14 naýqastyń jaı-kúıi qalaı
NUR-SULTAN. QazAqparat – Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova koronavırýs juqtyrǵan 14 jańa naýqastyń jaı-kúıi týraly aıtyp berdi, dep habarlaıdy QazAqparat tilshisi.
«14 adamnyń barlyǵy bir reıspen kelgen joq. Bes adam – qaladaǵy ınfektsııalyq bloktyń statsıonarynda jatqan. Qalǵan 9 adam – epıdemıologııalyq jaǵdaıy qolaısyz elderden kelgen jolaýshylardy tekserý barysynda tabyldy. Onyń ishinde 4 adam – Bas sanıtarlyq dárigerdiń qaýlysy boıynsha epıdemıologııalyq jaǵdaıy qolaısyz dep tanylǵan Italııa men Ońtústik Koreıadan kelgen», - dedi basqarma basshysy Ortalyq kommýnıkatsııalar qyzmetindegi brıfıngte
Onyń aıtýynsha, bir naýqas juqpaly aýrýlar aýrýhanasynda ortasha deńgeıdegi Jedel respıratorlyq vırýstyq ınfektsııa dıagnozymen jatqan. Ony qosymsha tekserý barysynda koronavırýstyq ınfektsııa tabyldy jáne em taǵaıyndaldy.
«Barlyǵynyń jaǵdaıy qanaǵattanaralyq, klınıkalyq belgiler joq. Barlyǵy Nur-Sultan qalasynyń kópbeıindi medıtsınalyq ortalyǵynyń ınfektsııalyq statsıonaryna jatqyzyldy», - dedi S. Qısyqova.
Aıta keteıik, Nur-Sultanda koronavırýs boıynsha taǵy 14 jańa naýqas tirkeldi.
Osylaısha, qaýipti indetpen aýyrǵandar sany 27-ge jetti. Onyń ishinde 16 jaǵdaı - Nur-Sultanda, 11 fakti - Almatyda tirkelgen.
Sondaı-aq, Qazaqstanda tótenshe jaǵdaı jarııalanyp, azamattardyń 15 sáýirge deıin el aýmaǵynan shyǵýyna tyıym salyndy.
QR Prezıdenti Qasym-Jomart Toqaev el halqyna úndeý joldady.
