Nur-Sultandaǵy keptelis máselesin sheshý úshin keshendi kólik syzbasy ázirlenedi
NUR-SULTAN. QazAqparat – Elordadaǵy kólik keptelisi máselesin sheshý maqsatynda keshendi kólik syzbasy ázirlenip jatyr, dep habarlaıdy QazAqparat tilshisi.
Aıta ketsek, osy jyldyń qańtar aıynda ótken Úkimettiń keńeıtilgen otyrysynda Nur-Sultan qalasynyń ákimi elordadaǵy Qabanbaı batyr dańǵyly alty jolaqqa keńeıtiletinin málim etken edi. Atalǵan kósheniń qurylysyn qashan bastap, qashan aıaqtaý josparlanyp otyrǵanyna baılanysty QazAqparat tilshisi qala ákimdigine saýal joldap kórdi.
«Qazirgi kezde Qabanbaı batyr dańǵylyn rekonstrýktsııalaý jobasynyń tehnıka-ekonomıkalyq negizdemesi ázirlendi. Jobada Saltanat saraıynan bastap Nursultan Nazarbaev atyndaǵy halyqaralyq áýejaıǵa deıingi aýmaqta dańǵyldy rekonstrýktsııalaý jáne keńeıtý kózdelgen. Atalmysh jobanyń ákimgeri – «QazAvtoJol» UK» AQ. Jobany iske asyrý merzimi jumys qujattamasyn ázirleý kezinde kórsetiledi», - dep jaýap berdi qala ákimdiginen.
Sonymen qatar elorda ákimdigi eldiń basty shaharynda halyq sanynyń kóbeıip kele jatqanyna baılanysty kólik keptelisi problemasyn qalaı sheshilgeli jatqanyn habarlady.
««Nur-Sultan – jaıly qala» master-josparyna sáıkes 2030 jylǵa deıin qalany damytý strategııasy aıasynda halyq sanynyń ósý boljamy eskeriledi. Osyǵan baılanysty atalǵan qujat aıasynda keshendi kólik syzbasy (KKS) ázirlenýde», - dep habarlaıdy ákimdikten.
Aıta ketsek, KKS-tiń maqsaty – barlyq kólik aǵynyn ońtaılandyrý, elordanyń kóshe-jol jelisine túsetin júktemeni azaıtý jáne tıimdi tehnıkalyq jáne qala qurylysy sheshimderin taldaý arqyly barlyq kólik túrlerin bir kólik jelisine ıntegratsııalaý bolyp otyr.
