Nur-Sultandaǵy balabaqshalarda kezekshi toptardyń rejım algorıtmi bekitiledi
NUR-SULTAN. QazAqparat – Tótenshe jaǵdaı rejıminen keıin jumysyn qashan bastaıtyny aıqyndalatyn elordalyq balabaqshalarda kezekshi toptardyń rejım algorıtmi bekitilmek, dep habarlaıdy QazAqparat tilshisi.
Nur-Sultan qalalyq bilim basqarmasynyń basshysy Sholpan Qadyrovanyń aıtýynsha, osy jyldyń 18 naýryzynan bastap elordadaǵy mektepke deıingi bilim berý uıymdarynyń bári menshik nysanyna qaramastan qyzmetin toqtatqan. Jalpy astanada 55 708 bala bar ártúrli úlgidegi 377 mektepke deıingi uıym jumys isteıdi.
«Balabaqsha qyzmetkerleri men meńgerýshilerine óz qalaýy boıynsha aqyly eńbek demalysy berildi. Menshik nysanyna qaramastan barlyq mektepke deıingi uıym tótenshe jaǵdaı kezeńinde memlekettik tapsyrys boıynsha qarjylandyrýmen tolyq qamtamasyz etilgen. Mektep jasyna jetken balalardy balabaqshadan shyǵarý jyl saıyn 1 tamyzǵa deıin, sondaı-aq balalardy jas erekshelikterine baılanysty bir toptan kelesi topqa aýystyrý osy jylǵy 1-31 tamyz aralyǵynda júzege asyrylady. Sonymen qatar, Qazaqstanda tótenshe jaǵdaı rejımi men karantın engizilýine baılanysty mektepke deıingi uıymdardyń qyzmeti tótenshe jaǵdaı rejımi aıaqtalǵanǵa deıin toqtatyldy», - dedi Sholpan Qadyrova búgin ótken baspasóz máslıhatynda.
Basqarma mektepke deıingi uıymdardaǵy bosaǵan oryndar men túlekterdiń sanyna monıtorıng júrgizip otyr. Jınaqtaý merzimi týraly sheshim tótenshe jaǵdaı rejımi alynǵannan keıin qabyldanady.
«Mektepke deıingi uıymdar óz jumysyn bastaý úshin Densaýlyq saqtaý mınıstrligi nysandardy paıdalanýǵa berý tártibi men erejelerin ázirleýde. Bul qujatta nysandarda sanıtarlyq-dezınfektsııalyq rejımdi saqtaý normalary, sondaı-aq mektepke deıingi balalar uıymdarynyń kezekshi toptarynyń rejım algorıtmi kórsetiledi. Balabaqshalardyń naqty qaı ýaqytta jumysyn bastaıtyny tótenshe jaǵdaı aıaqtalǵannan keıin belgili bolady», - deıdi ol.
