Nur-Sultandaǵy «AQMOL» dúkender jelisinde 300 tonna ónim satyldy

KÓKShETAÝ. QazAqparat – Nur-Sultan qalasyndaǵy Aqmola oblysynyń «AQMOL» fırmalyq dúkender jelisinde 500 mln teńgeniń 300 tonna azyq-túlik ónimi satyldy, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.

Vedomstvonyń málimetinshe, elorda turǵyndaryna aqmolalyq taýar óndirýshilerdiń ónimderin tikeleı jetkizý boıynsha «AQMOL» fırmalyq dúkender jelisi quryldy. Osynyń nátıjesinde elorda turǵyndary naryq baǵasynan 15-20 paıyzǵa arzan azyq-túlik ónimderin satyp alý múmkindigine ıe boldy.

«Búgingi tańda 5 dúken jumys isteıdi. 2019 jyly munda jalpy quny 495 mıllıon teńge bolatyn 290 tonnadan astam azyq-túlik ónimi satyldy.

Elorda aglomeratsııasyn damytý sheńberinde Nur-Sultan qalasynan shyǵa berisinde jáne kire bersinde «AQMOL» saýda jelisin keńeıtý josparda bar», - deıdi ákimdiktiń baspasóz qyzmetindegiler.

Jalpy, 2019 jyly Aqmola oblysynyń aýyl sharýashylyǵy taýarlaryn óndirýshiler el astanasyndaǵy bazarlarǵa 113,6 myń tonna sút ónimin, 28,6 myń tonna et jáne et ónimderin, 276,5 mıllıon jumyrtqa jetkizdi. Oblys elordanyń sútke degen suranysynyń 34 paıyzyn jabady.

«Úkimet bekitken elordanyń aınalasynda azyq-túlik beldeýin qalyptastyrý boıynsha Jol kartasy sheńberinde 2021 jylǵa deıin 7 200 basqa arnalǵan 5 taýarly sút fermasyn ashý josparlanǵan. Sondaı-aq, tamshylatyp sýarý jerleriniń kólemin 18 myń gektarǵa jetkizý máselesi de nazarda. Elordaǵa jetkizilgen azyq-túlik ónimderi «Metro», «Astyqjan», «Magným», «Ramstor» jáne «Eýrazııa», «Álem», «Shapaǵat» tárizdi 44 iri saýda oryndarynda satylady», - dep tolyqtyrdy vedomstvodan.

Aıta keteıik, Aqmola oblysy respýblıkadaǵy iri agraraly óńirlerdiń biri sanalady. Óńirde un tartý ónerkásibi durys jolǵa qoıylǵan. Sondyqtan, oblys elorda turǵyndarynyń un men jumyrtqaǵa degen suranys tolyq jaba alady.

Budan bólek, ótken jyly aqmolalyq aýyl sharýashylyǵy taýarlaryn óndirýshiler 102 myń tonnadan astam kartop, (suranystyń 92 paıyzy), 30,3 myń tonnadan astam kókónis (suranystyń 30 paıyzy) jetkizdi.

Barlyq sharýashylyq sanattary boıynsha tiri salmaqta 140,1 myń tonna et, 396,1 myń tonna sút, 860,4 mıllıon dana jumyrtqa óndirildi. Іri qara sany 1,8 paıyzǵa (430,2 myń basqa deıin) , qus sany 7 paıyzǵa (8,1 mıllıon basqa deıin) kóbeıdi.