Nur-Sultanda júrgen qoıandarǵa qatysty mınıstrlik pikir bildirdi

NUR-SULTAN. QazAqparat - QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar álemi komıteti elorda kóshelerinde júrgen or qoıanǵa qatysty vıdeoǵa pikir bildirdi, dep habarlaıdy QazAqparat tilshisi.

Áleýmettik jelide Mınıstrlikter úıiniń mańynda júrgen qoıan týraly vıdeo tarady. Vıdeo avtory karantınniń tabıǵatqa oń áser etip jatqanyn, ań-qustardyń adamnan qoryqpaıtynyn aıtady.

«Shyn máninde tabıǵattyń jandanýyna karantınniń esh qatysy joq. Qoıan, túlki, elik syndy jabaıy ańdar astanamyzda baıaǵydan bar», - dep jaýap berdi Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet.

Onyń aıtýynsha, Mınıstrlikter úıiniń artynda, Aqorda jaqta shaǵyn orman bar. Vıdeodaǵy qoıan sol ormannan kelýi múmkin.

«Nur-Sultanda ań-qustyń túr-túri bar. 1997 jyly elordanyń jasyl beldeýi quryla bastady jáne Elbasynyń jyl saıyn tabıǵatqa qyrǵaýyl men elik jiberýi dástúrge aınaldy. Esil ózeninde sporttyq balyq aýlaýdy damytý, ózender júıesin saqtaý úshin jyl saıyn 200 myń shabaq jiberemiz. Odan bólek, sý betine aqqý, qaz, qoqıqazdar ýaqytsha qonaqtaıdy. Qala ishi neǵurlym ormanǵa tolsa, soǵurlym ekologııalyq teńgerim saqtalady», - dedi Sáken Dildahmet.

Aıta keteıik, agenttik tilshisi «vıdeo avtory karantın kezinde qydyryp júrgeni úshin jaýapqa tartylýy múmkin be?» degen suraqty Polıtsııa departamentine qoıǵan edi.

«Eger shyn máninde qydyrǵan bolsa, árıne jaýapqa tartylady. Biraq, qazirgi ýaqytta ol kisi (vıdeo avtory - red.) týraly málimet joq», - dedi Nur-Sultan qalalyq Polıtsııa departamentiniń baspasóz hatshysy Elmıra Sháýlenova.