Nur-Sultanda jemqorlyq qylmystary qaı salada jıi tirkeledi

NUR-SULTAN. QazAqparat –Nur-Sultan qalasy sybaılas jemqorlyqqa qarsy is-qımyl departamentiniń basshysy Shyńǵys Qabdýla jemqorlyq faktileri qaı salada jıi tirkelip jatqanyn atady, dep habarlaıdy QazAqparat tilshisi.

«Tájirıbege súıensek, biz áli de bolsa keıbir memlekettik organdardyń qyzmetinen jaǵymsyz tendentsııalardyń ajyramaǵanyn kórip otyrmyz. Jyl basynan beri bizdiń departamentte 95 qylmys tirkeldi. Onyń úsheýi asa aýyr, 48-i aýyr qylmys sanatyna jatady. Jalpy 95 qylmystyń 65-i jemqorlyq sıpatta bolǵan. Onyń negizgi bóligi paraqorlyq faktileri boıynsha tirkelgen – 53 fakti. Qarajat jymqyrý boıynsha 17 qylmys esepke alyndy», - dedi ol Astana Adaldyq Alańy jobalyq keńsesinde ótken onlaın brıfıngide.

Onyń aıtýyna qaraǵanda, jemqorlyq qylmysy úshin sottalǵandardyń ishinde respýblıkalyq deńgeıdegi 3 sheneýnik bolǵan.

«Bul sandy salalarǵa jiktesek, eń kóp qylmys quqyq qorǵaý blogyna tıesili. Bul salada 28 fakti anyqtaldy. Densaýlyq saqtaý salasynda – 10, qurylys salasynda – 6, energetıka salasynda - 8, bilim berýde – 3 qylmys tirkeldi. Salyq jáne mádenıet salasynda da osyndaı tendentsııa baıqalyp otyr.

Jalpy qylmystyq jaýapqa 47 tulǵa tartyldy. Onyń ishinde respýblıkalyq mańyzdaǵy 3, qala deńgeıindegi 2 laýazymdy tulǵa bar. Qala deńgeıindegi 30 adamǵa bas bostandyǵynan aıyrý, aıyppul sııaqty túrli jazalar taǵaıyndaldy. Onyń arasynda 20 adam sybaılas jemqorlyq qylmys jasaǵany úshin sottaldy», - dedi departament basshysy.