Nur-Sultanda jedel járdem kólikterine arnap «jasyl baǵdarsham» jobasy engizildi
NUR-SULTAN. QazAqparat - Nur-Sultanda «103» sanıtarııalyq avtokólikterine arnap «jasyl baǵdarsham» pılottyq jobasy sátti engizildi. Bul tehnologııa baǵdarshamdy qyzyldan jasylǵa aýystyrý arqyly reanımobılderge «jasyl dáliz» usynady. Qazirgi ýaqytta jabdyqtar reanımatsııalyq brıgadalary bar birqatar jedel medıtsınalyq kómek mashınalaryna ornatyldy, dep habarlaıdy qalalyq ákimdiktiń baspasóz qyzmeti.
Jedel járdemge arnalǵan bul tehnologııa pılot retinde «City Transportation Systems» kompanııasymen birlesip densaýlyq saqtaý salasyn tsıfrlandyrý aıasynda 2018 jyly engizilgen. Tehnologııa JMK avtomobılderine ornatylǵan aqparattyq júıeler men arnaıy jabdyqtardy ıntegratsııalaý arqyly júrgizýshiler qajet bolǵan jaǵdaıda baǵdarsham sıgnaldaryn qyzyldan jasylǵa aýystyra alatyndyǵymen erekshe.
«Atalǵan tehnologııany engizý brıgadanyń naýqasqa jetý ýaqytyn aıtarlyqtaı qysqartady. Osylaısha jedel medıtsınalyq kómekti ýaqytyly jáne sapaly kórsetý boıynsha kórsetkishter jaqsardy. Ary qaraı qala ákimdigi men Qoǵamdyq densaýlyq saqtaý basqarmasy sanıtarlyq avtokólikterdiń bárin osy tehnologııamen jabdyqtaýdy jalǵastyrady», - delingen basqarma habarlamasynda.
«Jasyl baǵdarsham» jedel járdem kóligin súıemeldeýdiń jaǵymdy jaqtaryn kórsetti. Atap aıtqanda, júrý ýaqyty orta eseppen 30%-ǵa qysqardy.
Osyǵan deıin gospıtalǵa jetý ýaqyty 14 mınýtty alsa, bul tehnologııanyń kómegimen jedel járdem kóligi mejeli jerge, sondaı-aq 11 km nemese odan da uzaqó jolǵa 10 mınýtqa jeter-jetpes ýaqytta jetedi.
«Shaqyrýǵa asyǵyp bara jatqanda nemese patsıentti aýrýhanaǵa múmkindiginshe jedel jetkizý kezinde bul tehnologııa biz úshin taptyrmaıtyn kómek bolyp sanalady. Sebebi biz úshin ár mınýt qundy. Ásirese, keshki keptelis ýaqytynda mańyzdy ról atqarady», - deıdi JMMK reanımobıl júrgizýshisi Ashat Aqtaev.
Qala ákimi Altaı Kólginov 2020 jyldyń kúzinde «103» kólik quraldaryn ıntellektýaldy kólik júıesine tolyqqandy biriktirýdi qamtamasyz etý máselesin tapsyrǵan bolatyn.
