Nur-Sultanda jazǵy lagerlerdiń jármeńkesi ótedi
NUR-SULTAN. QazAqparat - Mektep oqýshylarynyń úsh aılyq demalystary qarsańynda elordada «Jazǵy lagerler jármeńkesi-2019» ótedi, dep habarlaıdy QazAqparat.
Nur-Sultan qalasy ákimdigi saıtyndaǵy aqparatqa sáıkes, jármeńke jeksenbi, 28 sáýir kúni M.Ótemisuly atyndaǵy Oqýshylar saraıy mańyndaǵy «Arbat» jelekjolynda ótedi.
Ata-analar Aqmola oblysyndaǵy «DISCOVERY», «Mırotvorets», «Juldyz», «Chaıka», «Sokol», «Lesnaıa skazka» jáne «Baldáýren» balalar saýyqtyrý lagerleriniń, «Parýs», «Samuryq», «Suńqar» jáne «Zvezdnyı» balalar saýyqtyrý ortalyqtarynyń, «ARMAN» balalar jáne jasóspirimder týrızmi ortalyǵynyń, «Nomads Camp» halyqaralyq kıiz úı lageriniń, M. Ǵabdýllın atyndaǵy demalys kesheniniń, «Tulpar» etnıkalyq kıiz úı lageriniń, «Batyr» shatyrly lageriniń qyzmetimen tanysa alady.
«Árbir ata-ana óz talǵamyna saı jazǵy lagerdi óz betinshe tańdap, baǵdarlamalarmen, turý jáne tamaqtaný, tasymaldaý jáne qaýipsizdikti qamtamasyz etý jaǵdaılarymen tanysa alady», - delingen habarlamada.
Jármeńke saǵat 10:00-19:00 aralyǵynda ótedi.
