Nur-Sultanda jaýyngerlik ónerdiń úzdikteri marapattaldy
NUR-SULTAN. QazAqparat – Elordada ótken Qazaqstannyń Jaýyngerlik óner qaýymdastyǵynyń ІІ kongresinde karate, tolyq kontaktili sport, MMA aralas jekpe-jek, jekpe-jek sport túrleri boıynsha úzdik sportshylar marapattaldy, dep habarlaıdy QazAqparat tilshisi.
Atap aıtqanda, karate baǵytynda «Úzdik sportshy» atalymynda Shınkıokýshınkaı karate federatsııasynyń sportshysy ótken jyly Nur-Sultan qalasynda ótken Karateden álem chempıonatynyń jeńimpazy Vladımır Artıýshın úzdik tanyldy. Al dál osy baǵytta «Úzdik bapker» atalymynda «Kıokýshınkaı kan-karate» Ulttyq respýblıkalyq federatsııasynyń jattyqtyrýshysy Azamat Aıdarhanuly jeńiske jetti.
Tolyq kontaktili sport túrlerinen «Úzdik sportshy» atalymyn Mýaı-taı federatsııasynyń sportshysy Almas Sársembekov jeńip alsa, osy atalymda «Úzdik bapker» ataǵyn «Taekvondo ITF» qaýymdastyǵynyń jattyqtyrýshysy Valerıı Kogaı ıelendi.
Al jekpe-jek sport túrleri boıynsha QR Djıý-djıtsý qaýymdastyǵynyń sportshysy Móldir Mekenbaeva «Úzdik sportshy», Sporttyq jáne jaýyngerlik sambo federatsııasynyń jattyqtyrýshysy Bolat Qojahmetov «Úzdik bapker» atandy.
MMA aralas jekpe-jek sport túrlerinen «Úzdik sportshy» ataǵy MMA Qazaqstandyq aralas jekpe-jek birikken qaýymdastyǵynyń sportshysy Baǵdat Jubanyshqa, «Úzdik bapker» ataǵy Nurlan Mamyralıevke berildi.
Jeńimpazdarǵa Qazaqstannyń Jaýyngerlik óner qaýymdastyǵynyń atynan Alǵys hattar men syılyqtar tabystaldy.
