Nur-Sultanda jataqhana turǵynyn belgisiz 4 adam soqqyǵa jyǵyp, tonap ketti
NUR-SULTAN. QazAqparat – Polıtsııaǵa 28 jastaǵy elorda turǵyny habarlasyp, belgisiz tórt adam keshke jaldap turatyn páterine kelip, uryp-soǵyp, aqsha talap etkenine shaǵymdanǵan, dep habarlaıdy QazAqparat Nur-Sultan qalasynyń Polıtsııa departamentiniń baspasóz qyzmetine silteme jasap.
Keıinirek ol adamdar zardap shekken turǵynnyń kórshisimen tanys ekeni anyqtaldy. Tanysynyń úıde bolmaǵanyn bilgen dostary, kórshisiniń aqshasyn tartyp almaq bolypty.
Olardyń áldenege aldanǵan sátin paıdalanǵan zardap shekken er adam bólmeden qashyp shyqqan. Ol joq kezde belgisiz adamdar bólmeden 50 myń teńge men 2 uıaly telefondy alyp, ketip qalǵan.
Nur-Sultan qalasynyń Polıtsııa departamentiniń «Almaty» aýdanynyń polıtsııa basqarmasynyń qyzmetkerleri jedel-izdeý sharalary kezinde qylmysqa kúdikti 4 azamatty anyqtap, qolǵa túsirdi. Olardyń ekeýi buryn qylmystyq jaýapqa tartylǵany belgili boldy. Kúdiktiler qylmys jasaǵanyn tolyq moıyndady.
Ustalǵan kezde olar urlanǵan aqshany jumsap úlgergen. Uıaly telefondar ıesine qaıtaryldy. Osy fakti boıynsha QR QK 191-baby boıynsha sotqa deıingi tergeý júrip jatyr.
Ustalǵan azamattardyń osy sekildi basqa da qylmystarǵa qatysy bar-joǵy anyqtalyp jatyr.
