Nur-Sultanda jasyl jelek aptap ystyqtan qalaı qorǵalady

NUR-SULTAN. QazAqparat - Nur-Sultanda shilde aıy aptap ystyqpen bastaldy. Sınoptıkterdiń aıtýynsha áli birneshe kúnge sozylady, dep habarlaıdy QazAqparat qala ákimdigine silteme jasap.

Osyǵan oraı elorda ákimdigi qaladaǵy aǵashtar, butalar, kógaldar men gúlzarlardy sýarý boıynsha arnaıy toptardy jumyldyrdy.

«Aýa raıy kúrt ysyp, temperatýra 36 jáne odan joǵary gradýsqa deıin kóteriledi. Osyǵan baılanysty kóshe-jol jelisin qarqyndy jýý týraly sheshim qabyldandy», - dedi «Astana-Zelenstroı» JShS resmı ókili Rústem Nursaǵıtov.

Elordanyń tórt aýdanynda ondaǵan arnaıy tehnıka kúndiz-túni eki aýysymmen jumys isteıdi.

Túngi sýarý jumysy kún saıyn keshki 7-den tańǵy 5-ke deıin júrgiziledi.

Qalalyq kommýnaldyq qyzmetter jasyl jelekterden bólek, jolǵa, trotýarlarǵa, aýlalar men avtoturaqtarǵa sý sebýmen de aınalysady.

Sýarý ýaqyty sýdyń az býlanatyn, sondaı-aq arnaıy tehnıkanyń kólik qozǵalysyna kedergi keltirmeıtin ýaqytyna sáıkes keledi.

Aıta ketý kerek, saıabaqtarda, gúlzarlarda jáne qalanyń basqa da qoǵamdyq keńistikterinde aǵashtar men jasyl jelekterdi sýarý avtomatty júıe arqyly júzege asyrylady.