Nur-Sultanda jastarǵa arnalǵan turǵyn úı baǵdarlamasy iske qosylady
NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda jastardyń baspana máselesi qandaı jolmen sheshilip jatqanyn túsindirip ótti, dep habarlaıdy elorda ákimdiginiń resmı saıty.
«Qalany damytýdyń jáne ómir súrýge qolaıly jaǵdaı jasaýdyń negizgi máselelerin talqyladyq. Qysqasha eki baǵytqa toqtalǵym keledi: «Elorda Jastary» jastar baǵdarlamasy jáne erekshe qajettiligi bar adamdar úshin jaǵdaı jasaýǵa baǵyttalǵan.
Ótken jyly volonterlermen, jastar uıymdarynyń ókilderimen kezdesýlerde «Elorda Jastary» baǵdarlamasynyń tujyrymdamasyn ázirledik. Onda kórsetilgen negizgi baǵyttar: sapaly jáne qoljetimdi bilim berý, jumysqa ornalasýǵa jáne jastar kásipkerligin damytýǵa kómek kórsetý, kásiptik baǵdarlaý, bos ýaqytty tıimdi ótkizý, salaýatty ómir saltyn nasıhattaý jáne t. b.
Memleket basshysynyń tapsyrmasy boıynsha «Elorda Jastary» baǵdarlamasynyń negizgi baǵyty – turǵyn úı máselesi. Osy jyly elordanyń jas mamandaryn jeńildikpen áleýmettik nesıelendirýdiń jańa turǵyn úı baǵdarlamasyn iske qosýdy josparlap otyrmyz. Bul baǵdarlamaǵa 36 jasqa deıingi jastar qatysa alady (jubaıynyń/zaıybynyń jasy mańyzdy emes). Elordalyq tirkelim kem degende bir jyl bolýy kerek jáne baǵdarlama úmitkeriniń jeke baspanasy bolmaýy kerek. Resmı jumys ótili 1 jyldan kem emes bolýy shart.
Osylaısha atalǵan turǵyn úı baǵdarlamasyna qatysýshy turǵyn úı satyp alýǵa 13 mln teńgege deıin qaryz ala alady (jyldyq 5% jeńildikpen). Satyp alynatyn turǵyn úıdiń quny shekteýsiz.
Sonymen qatar osy jyly Elbasynyń bastamasymen qolǵa alynǵan «Jumys isteıtin jastarǵa arnalǵan jalǵa beriletin turǵyn úı» baǵdarlamasy da jalǵasady. Osy baǵdarlama aıasynda jyl sońyna deıin taǵy 1 myńnan astam jastar baspanaly bolady.
Ekinshi baǵyt – múmkindigi shekteýli jandarǵa jaǵdaı jasaý. Qalada birqatar áleýmettik jobalar, sonyń ishinde «Kedergisiz keleshek» jobasy júzege asyrylýda. Osy joba jelisi boıynsha 12 beıimdeý sektsııasy ashyldy, respýblıkalyq klınıkalarǵa kvotalar bólindi, múgedekter arbalary jáne t. b. syıǵa tartyldy.
Sonymen qatar qalada birqatar áleýmettik nysandar salynýda: ońaltý ortalyqtary, kórý qabileti buzylǵan balalarǵa arnalǵan balabaqsha, paralımpıadalyq jattyǵý ortalyǵymen birlesip, múmkindigi shekteýli adamdarǵa arnalǵan sport keshenin salamyz.
Mysaly, ótken jyly Tuńǵysh Prezıdent qory men «Samuryq-Qazyna» qoyrynyń qoldaýymen №1 qalalyq balalar aýrýhanasy bazasynda «Qamqorlyq» ońaltý ortalyǵy ashyldy. Sondaı-aq BTsP, aýtızm, Daýn sındromy jáne t. b. dıagnozy bar balalardy ońaltýmen aınalysatyn birqatar ońaltý ortalyqtary ashyldy», - dep jazdy elorda ákimi.
