Nur-Sultanda jańa saıabaq ashyldy
NUR-SULTAN. QazAqparat - Elordada serýendeýge jáne jaıly demalysqa arnalǵan jańa qoǵamdyq oryn paıda boldy, dep habarlaıdy QazAqparat tilshisi.
Sport alańy, múmkindigi shekteýli balalarǵa arnalǵan oıyn alańy bar saıabaq Almaty aýdanyndaǵy Promyshlennyı eldi mekeninde ashyldy.
«Munda jaryqtandyrý, sýarý júıesi tolyǵymen avtomattandyrylǵan. Sonymen qatar, turǵyndar úshin zaman talabyna saı, zamanaýı, jattyǵý qurylǵylary ornatylǵan sport alańy salyndy. Buǵan qosa, balalarǵa arnalǵan oıyn alańy da ornatyldy», — deıdi Nur-Sultan qalasy Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Aıdyn Begimbekov.
A.Begimbekov saıabaqta múmkindigi shekteýli balalardyń da jaǵdaıy nazardan tys qalmaǵanyn aıryqsha atap ótti.
Park ishinde shaǵyn aýdannyń turǵyndarymen birge senbilik uıymdastyrylǵan. Onyń barysynda 40 qaraǵaı aǵashy da egilgen.
Basqarma basshysy atap ótkendeı, «Nur-Sultan — jaıly qala» jospary boıynsha elordanyń shet aýmaǵyndaǵy bos jatqan jerlerdi ıgerý arqyly, sol sııaqty jaramsyz eski ǵımarattardy buzý arqyly el ıgiligine, turǵyndardyń jaılylyǵyna arnalǵan alańqaılar, saıabaqtar birtindep ashylatyn bolady.
Bıylǵy jyldyń ózinde qalada 150 aýla men 50-den astam qoǵamdyq keńistik abattandyryldy.
