Nur-Sultanda jańa oqý jylynda «kezekshi synyptar» qalaı oqytylady
NUR-SULTAN. QazAqparat – Nur-Sultan Bilim basqarmasynyń basshysy Sholpan Qadyrova jańa oqý jylynda «kezekshi synyptar» qalaı jasaqtalyp, oqytylatynyn túsindirdi, dep habarlaıdy QazAqparat tilshisi.
«1 qyrkúıekte jańa oqý jyly elordalyq mektep (1-11 synyptar) pen kolledjdiń bárinde sabaq qashyqtan oqytý formatynda bastalady. Bul rette qatań sanıtarlyq sharalardy saqtaı otyryp, bastaýysh synyptyń oqýshylary úshin «kezekshi synyptardyń» jumysy josparlanýda. Onyń qalaı jumys isteıtinin túsindire keteıin: Bastaýysh synyp oqýshylarynyń ata-analarynyń ótinishi negizinde sanıtarlyq talaptardy saqtaı otyryp, «kezekshi synyptar» ashylady. Oqý birneshe aýysymmen júzege asady. Synyptar kishi toptarǵa bólinedi. Ol toptarda oqýshy sany 10-15-ten aspaıdy. Sabaqtar bir kabınette ótkizilip, úzilis ár túrli ýaqytta bolady. Sonymen qatar, sabaqtardyń bir bóligi qashyqtyqtan júrgiziledi», - dedi dedi Sholpan Qadyrova qala ákimdiginiń Feısbýktegi paraqshasynda ótken baspasóz máslıhatynda.
Basqarma basshysynyń aıtýyna qaraǵanda bul rette barlyq sanıtarlyq talaptardy saqtaý – basty mindetterdiń biri. Sanıtarlyq normalardy saqtaý úshin mektepter dezınfektsııalaý quraldarymen, sensor termometr, qorǵanys quralymen qamtamasyz etiledi.
Al dástúrli formattaǵy oqý jaǵdaıynda, ıaǵnı kezekshi synyptardyń jumysy úshin algorıtm kelesideı bolady:
- ata - analar balalardy «kezekshi synyptarǵa» ákeledi, biraq ǵımaratqa kirmeıdi.
- mekteptiń kireberisine dezınfektsııalyq kilemshe tóseledi;
- mektepke kirer kezde balanyń temperatýrasyn ólsheý;
- qoldy antısektıkpen óńdeý jáne maskanyń bolýy mindetteledi;
- barlyq qabattarda jáne árbir «kezekshi synypta» sanıtaızer ornatý;
- synypty jeldetý, kvartstaý jáne jýý kestesi;
- qyzyl syzyqpen belgileı otyryp, medıtsınalyq kabınetterdiń janynda oqshaýlaý bólmesin ashý.
