Nur-Sultanda jańa balabaqsha tórt jyldan beri bos tur
NUR-SULTAN. QazAqparat – Elordada memleket pen jekemenshik áriptestik aıasynda salynǵan balabaqsha ǵımaraty qańyrap bos tur, dep habarlaıdy QazAqparat «Habar 24-ke» silteme jasap.
Halyq ıgiligine berilýi tıis nysan birneshe jyldan beri bos tur. Bul – elordadaǵy «Family village» turǵyn alabynda ornalasqan balabaqsha. Balabaqsha qurylysyna qyrýar qarjy jumsalǵany anyq. Aýlasyna aǵash ta egilgen. Alaıda ıesiz.
«Jazda nege ashylmaı tur degen suraq týyndady. Salynǵan bolsa, nege ashylmaıdy. Ortalyqqa shyǵamyz. Jazda jaraıdy. Qysta qıyn. Bul aýmaqtyń turǵyndary tańnan turyp, balalaryn ortalyqqa tasyp áýre. Memlekettik bilim berý mekemelerinen munda tek mektep qana jumys istep tur. Al, balabaqshanyń sıqy mynaý. Aty bar, zaty joq», - deıdi qala turǵyny Aınagúl Súleımenova.
Bul aýdanda memlekettik balabaqsha joq. Tek jekemenshik balalar baqshasy bar, biraq oǵan aıyna 50 myń teńge tóleý kerek.
«Men balamdy qala ortalyǵyndaǵy balabaqshaǵa aparamyn. Jaqyn jerde memlekettik bóbekjaı joq. Bos turǵan bul ǵımaratty Nazarbaev zııatkerlik mektebine bergen degen áńgimeler aıtyldy. Munda turǵyndar óte kóp. Ár otbasynda keminde bir baladan bar», - dedi taǵy bir qala turǵyny Elena Vorobeva.
Jergilikti bılik ókilderi ǵımarattyń 4 jyldan beri paıdalanylmaı, bos turǵanyn rastady.
«Balabaqsha memlekettik bolady. 240 balany qabyldaımyz dep josparlap otyrmyz. 9 top bolady», - dep atap ótti Nur-Sultan qalasy ákimdigi bilim basqarmasy mektepke deıingi bilim berý bóliminiń basshysy Lázzat Qazbekova.
Ákimdik ókilderi balabaqsha kóp uzamaı iske qosylady dep sendirdi.
