Nur-Sultanda zańsyz qoqys shyǵarǵan qurylys kompanııalaryna aıyppul salyndy
NUR-SULTAN. QazAqparat – Nur-Sultan qalasynda zańsyz qoqys shyǵarǵan qurylys kompanııalaryna aıyppul salyndy, dep habarlaıdy QazAqparat.
Elorda ákimdiginen málim etkendeı, sanktsııalanbaǵan qoqys úıindileriniń paıda bolýyn boldyrmaý, sondaı-aq ekologııalyq jaǵdaıdy saqtaý maqsatynda Nur-Sultan qalasy ákimdiginiń Qorshaǵan ortany qorǵaý jáne tabıǵatty paıdalaný basqarmasy Ekologııa departamenti, Polıtsııa departamentiniń jergilikti polıtsııa qyzmeti, «Astana Eko polıgony» JShS jáne «Klın sıtı» JShS-men birlesip, qurylys nysandaryna reıdtik tekserýler men monıtorıng júrgizip keledi.
2021 jyldyń qańtar aıynda Nur-Sultan qalasynyń Polıtsııa departamenti tabıǵat qorǵaý polıtsııasy bólimshesiniń qyzmetkerleri QR ÁQBtK-niń 505-babynyń «abattandyrý erejelerin buzǵany úshin...» 59 shaǵyn jáne orta bıznes sýbektisi, 10 qurylys uıymy («Azııa Stroı Grýpp» JShS, «Kaz Building Company» JShS, «Zhakim Invest» JShS) ákimshilik jaýapkershilikke tartyldy. Sondaı-aq belgilenbegen jerge qoqys tókken 5 júk kólik júrgizýshisine 230 myń teńge somasyna aıyppul salyndy.
Esterińizge sala keteıik, 2020 jyly QR ÁQBtK-niń 505-baby boıynsha 844 shaǵyn jáne orta bıznes sýbektisi ákimshilik jaýapkershilikke tartyldy, 463 qurylys uıymyna 35 mln teńge kóleminde aıyppul salyndy. Al belgilenbegen jerge qoqys tókken 242 júk kóligi júrgizýshisi 11 mln teńge aıyppul tóledi.
«Ruqsat etilmegen jerlerge qurylys qoqystaryn tógýdiń aldyn alý jáne qatań sharalar qabyldaý maqsatynda reıdtik jumystar jalǵasatyn bolady. Al qasaqana buzýshylarǵa qurylys júrgizýi úshin berilgen lıtsenzııasynan aıyrýǵa, júkterdi tasymaldaý jónindegi qyzmetti toqtatýǵa deıingi qatań sharalar qoldanylatyn bolady», - dedi ákimdikten.
