Nur-Sultanda volonterler shtaby ashyldy

NUR-SULTAN. QazAqparat – Elordada volonterler shtaby ashyldy, ol «Astana Jastary» memlekettik mekemesi bazasynda jumys isteıdi. Búgingi tańda shtabta 2000-nan astam volonter tirkelgen, dep habarlaıdy qalalyq ákimdiktiń baspasóz qyzmeti.

Shtab janynda «ASTANA VOLUNTEERS» volonterler mektebi qurylǵan. Mektep aıasynda jastar áleýmettik, sporttyq, EVENT jáne ECO volonterlik baǵyttar boıynsha oqytylady. Sonymen qatar, tótenshe jaǵdaılar boıynsha da volonterler daýyndaý kózdelgen. Oqýǵa nıet bildirgen jastardyń aǵymdaǵy jyldyń aqpan aıynda kýrsqa jazylýyna múmkindigi bar.

Volonterler jylyna oraı elordada jastardy qoldaýǵa, volonterlikti damytýǵa baǵyttalǵan kóptegen sharalar uıymdastyrylýda. Sonyń biri – «Birge-Taza Qazaqstan» aktsııasy aıasynda ótetin «VOLUNTEERS CAMP» volonterlerine arnalǵan jyljymaly eko-lager jobasy. Atalmysh shara aıasynda 500-den astam jas kıim-keshekpen, tamaqpen, kólik qyzmetimen qamtamasyz etiledi dep josparlanǵan.

Sondaı-aq, «Qaýipsiz qala» ulttyq jobasy aıasynda birqatar is-sharalar ótedi.

Odan bólek, Nur-Sultanda múmkindigi shekteýli jandardy volonterlik qyzmetke qosýdy kózdeıtin ınklıýzıvti volonterlikti damytýǵa erekshe kóńil bólinedi.

Esterińizge salsaq, osy jyly memleket basshysy volonterlik qozǵalysqa belsendi qatysqan stýdentterdiń shákirtaqysyn 30 paıyzǵa kóterýdi tapsyrǵan bolatyn.

Volonterler jyly «Birgemiz», «My - vmeste» uranymen ótedi.