Nur-Sultanda vaktsınalaý qarqyny tómendedi

NUR-SULTAN. QazAqparat – Nur-Sultanda vaktsınalaý qarqyny bir aıda 46%-ǵa tómendegen. Bul týraly Nur-Sultan qalasynyń bas memlekettik sanıtarlyq dárigeri Sarhat Beısenova aıtyp berdi, dep habarlaıdy QazAqparat tilshisi.

«Sońǵy aıda Nur-Sultanda vaktsınalaý qarqyny tómendedi. Mamyr aıynda vaktsınalaý sany sáýir aıymen salystyrǵanda 46%-ǵa tómen. Alaıda, biz halyqtyń vaktsınaǵa degen suranysy men tilegin kórip otyrmyz. Jappaı vaktsınalaý halyq úshin tek sanıtarlyq talaptarǵa sáıkes keletin egý kabınetterinde júrgiziletinin atap ótkim keledi», - dedi Sarhat Beısenova elorda ákimdiginiń brıfınginde.

Ákimdiktiń málimetinshe, turǵyndarǵa vaktsınalaýdyń qoljetimdi bolýy úshin qalalyq emhanalarmen birge qosymsha 9 egý pýnkti ashylǵan.

Atap aıtqanda, sol jaǵalaýda «Mega Silk Way», «Han-Shatyr», «Kerýen», «Azııa Park», «Saryarqa» SOO jáne «Ábý-Dabı Plaza» kesheninde ashylǵan. Oń jaǵalaýda «Álem» jáne «Eýrazııa-3» saýda úıleriniń aýmaǵynda, «Mechta» saýda ortalyǵynda egý pýnktteri uıymdastyryldy, onda barlyq sanıtarlyq normalar saqtalǵan.

Aıta keteıik, 9 maýsymdaǵy jaǵdaı boıynsha elorda halqynyń 9,4%-y nemese 111 683 adam eki komponentti tolyq aldy. Birinshi komponentpen 169 632 adam nemese 14,3% qamtylǵan.