Nur-Sultanda uzaqqa sozylǵan 20 nysannyń qurylysy aıaqtalady
NUR-SULTAN. QazAqparat – Jyl sońyna deıin qurylysy uzaqqa sozylǵan 20 nysan qoldanysqa beriledi. Bul týraly Nur-Sultan qalasynyń ákimi Altaı Kólginov aıtyp berdi, dep habarlaıdy QazAqparat tilshisi.
«Ótken jyldyń basynda qalamyzda qurylysy sozylǵan 53 nysan boldy. 2019 jyldyń qorytyndysy boıynsha 10 problemalyq nysandy aıaqtadyq. Bıyl bul sandar eki esege artty, ıaǵnı jyl sońyna deıin 20 problemalyq nysandy tapsyramyz. ıAǵnı 52 nysannyń 30-yn qoldanysqa beremiz. Bul óte qıyn jumys. Kóp ýaqytymyz sot protsesterine, qarjy modelin qurýǵa, jobalyq-smetalyq qujattamany, ınjenerlik jelini qalpyna keltirýge jumsaldy», - dedi ákim Ortalyq kommýnıkatsııalar qyzmetinde ótken brıfıngte.
Ákimniń aıtýynsha, ár nysan boıynsha jeke jumys kestesi bekitilgen. Mysal retinde ákim «Terrıtorııa komforta-1» TK qurylysy bastalǵanyn atap ótti.
«Bul nysan birneshe jyldan beri aıtylyp keldi. Onda ınvestorlarmen kelisimge kelip, qoldaý kórsettik. Olar óz qarajatyna nysandy súrip tastady jáne pandemııaǵa qaramastan bul jumystardy aıaqtady. Qurylys bastaldy», - dedi A. Kólginov.
