Nur-Sultanda úılerdiń kireberisi ekinshi ret dezınfektsııalanyp jatyr - reportaj
«Astanalyq dezınfektsııa» JShS dırektorynyń orynbasary Bekbolat Talǵarbekovtyń aıtýynsha, alǵashqy kezeńde qalanyń barlyq kireberisteriniń birinshi qabaty men lıft jáne balalar alańy ǵana tazartylǵan.
«Ekinshi kezeńde úıdiń barlyq qabattary, adamdar ustaýy múmkin esik, esik tutqasy, eden, lıft batyrmalary dezınfektsııalyq óńdeýden ótedi. Ásirese, Esil aýdanynyń úılerinde (70%) tazartý belsendi júrip jatyr. Saryarqa aýdanynda bul jumystar aıaqtalýǵa jaqyn», - dedi Bekbolat Talǵarbekov «QazAqparat» tilshilerine bergen suhbatta.
Spıker dezınfektsııalyq tazartýǵa qandaı quraldar qoldanylatynyn aıtyp berdi.
«Kaltsıı gıpohlorıtin sýmen aralastyryp, shashyp shyǵamyz. Tehnıkalyq sıpattamaǵa sáıkes, munyń barlyǵy ınfektsııa juqtyrýdyń aldyn alý úshin jasalýda. Ony adamǵa zııan dep aıtpas edim, sebebi ózimiz osy quraldarmen jumys istep júrmiz. Tek allergııasy bar adamdarǵa áser etýi múmkin. Sondyqtan, Páter ıeleri kooperatıvi (PIK) óńdeýden keıin eki saǵat turǵyndardyń podezge shyqpaýyn ótinedi. Keıbir lıft batyrmalary dezınfektsııalyq quraldan keıin qaraıyp qalady. Sol sebepti, PIK jumysshylary ózderi óńdeıdi nemese tsellofanmen jaýyp qoıýǵa tyrysady. Múmkindiginshe, PIK-pen birlesip jumys istep jatyrmyz», - dedi ol.
Sonymen birge, B. Talǵarbekov koronavırýs ınfektsııasy tabylǵan kireberister jóninde túsinikteme berdi.
«Karantınge jabylǵan kireberisterge kirmeımiz. Biz tek aldyn alý sharalarymen ǵana aınalysamyz. Páter ıeleri kooperatıvi de ártúrli bolady. Ásirese, sol jaǵalaýdaǵy úılerdiń kireberisinde antıseptık qoıylǵan. Tańerteń erte jumysqa shyqqanda - hlordyń ıisi seziledi. Osy qarqynmen jumysty jalǵastyrsaq, koronavırýsty jeńip shyǵamyz. Eń bastysy, turǵyndar barlyq talaptardy ustanyp, ásirese balalarmen kóshege shyqpaýy kerek», - dedi ol.
Áleýmettik jelidegi dezınfektsııalyq tazartýshylardyń kireberiste sýretke túsip, ketip qalatyny týraly beınejazba taralǵan edi. Bul týraly da spıkerdiń pikir bildirdi.
«Meniń jeke tájirıbemde de osyndaı oqıǵa boldy. Ózderińiz sekildi jýrnalıster jumys aıaqtalǵanda keledi de, túsirilim jasaýdy suraıdy. Osylaı bizdiń qyzmetkerler BAQ ókilderiniń kamerasyna túsip jatqanda, narazy turǵyndar syrtynan sýretke túsirip, jelige júktep jiberedi. Ári qaraı neshe túrli shaǵymdy estýge májbúr bolamyz. Biraq, bul esh qaljyń emes, tutas elimizge koronavırýs ınfektsııasy tarady. Sondyqtan, biz de jumysymyzǵa jaýapty qaraımyz», - dedi B. Talǵarbekov.
