Nur-Sultanda úsh kúnde karantın tártibi 52 ret buzylǵan
NUR-SULTAN. QazAqparat – Nur-Sultandaǵy arnaıy mobıldik toptar úsh kúnde 52 karantın erejesin buzý faktisin tirkedi, dep habarlaıdy QazAqparat Nur-Sultan qalasynyń Polıtsııa departamentine silteme jasap.
Polıtseıler, epıdemıologtar, volonterler men jergilikti atqarýshy organ ókilderinen quralǵan mobıldik toptar karantın tártibiniń saqtalýyn baqylap júr.
Keıingi úsh kúnde Nur-Sultan qalasynda 52 tártip buzý oqıǵasy tirkeldi. Olardyń 16-y maska taǵý men áleýmettik qashyqtyqty saqtamaý syndy mindetti ereje bolsa, 36-sy tyıym salynǵan ýaqytta da jumysyn jalǵastyrǵan kásipkerlerge qatysty.
Materıaldar taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi.
Sátpaev kóshesinde túngi ýaqytta jasyryn jumys istep jatqan loýndj-bar anyqtaldy. Oıyn-saýyq mekemesi bas sanıtarııa dárigeriniń qaýlysyna qaramastan, qyzmetin jalǵastyrǵan. Mekemeniń esikteri jabyq bolǵanymen, ishke tek senimdi klıentterdi ǵana kirgizip, ishten jaýyp alyp otyrǵan. Tekseris kezinde mekemede karantın tártibi men sanıtarııa talaptaryn buzǵan 64 adam boldy.
Sonymen qatar, mobıldik top Balqantaý kóshesinde túnde kelýshilerdi qabyldaǵan saýnany anyqtady. Saýnada 11 adam jınalyp, karantın erejesin buzǵan.
Barlyq tártip buzýshyǵa qatysty materıaldar taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi. Olar QR ÁQBK 425-baby boıynsha ákimshilik jaýapqa tartylady.
Nur-Sultan qalasynyń Polıtsııa departamenti azamattardy qoǵamdyq oryndardaǵy erejege jaýapkershilikpen qarap, sanıtarııa talaptaryn oryndaýǵa shaqyrady. Koronavırýs taralyp ketpes úshin polıtseıler azamattarǵa karantın tártibin saqtaý men jeke qorǵanys quraldaryn taǵýdyń mańyzdylyǵy týraly túsindirme jumystaryn júrgizip jatyr.
