Nur-Sultanda úsh aıda kólik apatynan 49 jaıaý júrginshi jaraqat aldy
NUR-SULTAN. QazAqparat – Nur-Sultan qalasynyń polıtsııa departamenti anyqtaý basqarmasynyń bastyǵy Dıas Toqatov jyl basynan beri kólik apatynan 49 jaıaý júrginshi jaraqat alǵanyn málim etti, dep habarlaıdy QazAqparat tilshisi.
«2022 jyldyń 3 aıy ishinde qala joldarynda 113 jol-kólik oqıǵasy tirkeldi. Saldarynan 121 adam jaraqat aldy. Bulardyń úsheýi qaıtys boldy», - dedi departamenttiń basqarma bastyǵy baspasóz máslıhatynda.
Onyń aıtýynsha, byltyr bul kezeńde jol-kólik oqıǵasynan 4 adam kóz jumǵan.
«Anyqtaý basqarmasy jyl basynan beri jol-kólik oqıǵasy saldarynan denege aýyr jaraqat keltirý deregimen 22 qylmystyq isti tirkedi. Onyń ishinde 19 is denege aýyr jaraqat salý sanatyna jatady, 3-eýi kisi ólimi sanatyna tirkeldi. Osy ister aıasynda 16 adam qylmystyq jaýapkershilikke tartyldy», - dedi DııasToqatov.
Basqarma mamandary atalǵan jol-kólik oqıǵalarynyń sebepterine taldaý júrgizgen.
«Kólik júrgizýshileriniń jibergen qatelikteri saldarynan 93 jol-kólik oqıǵasy oryn alǵan. Olardyń deni júrgizýshilerdiń jol qozǵalysy erejesin nashar bilýinen týyndaǵan. Atap aıtqanda, manevr jasaý kezinde 17 fakt jáne jol qıylystarynan ótý kezinde 24 fakt tirkelgen. Sonymen qatar jaıaý júrginshiler de jol-kólik oqıǵalaryna sebepshi bolýda. Olardyń jol qozǵalysy erejesin saqtamaýy saldarynan 20 oqıǵa oryn alǵan», - dedi basqarma bastyǵy.
Onyń málimetinshe, jaıaý júrginshilerdiń qatysýymen 49 jol-kólik oqıǵasy boldy.
«Onyń ishinde 2 adam qaıtys boldy. Kámeletke tolmaǵandardyń qatysýymen 14 jol-kólik oqıǵasy bolyp, 1 bala kóz jumdy. Jyl basynan beri kámeletke tolmaǵandardyń kinásinen 6 jol-kólik oqıǵasy oryn aldy.
Kólik apatynyń eń kóp taraǵan túri – betpe-bet soqtyǵysý. Osyndaı 19 oqıǵanyń saldarynan 21 adam jaraqat aldy. Janap soqtyǵysý – 13, jolaı soqtyǵysý -19. Jaıaý júrginshini basyp ketý de eń kóp taraǵan apat túrine jatady. Osyndaı oqıǵalardan 49 adam jaraqat alyp, 2 adam qaıtys boldy», - dedi ol.
Eske salsaq, elordalyq polıtsııa departamenti ákimshilik polıtsııa basqarmasynyń basshysy Eljan Chýpekov jyl basynan beri 486 adam kólik júrgizý quqyǵynan aıyrylǵanyn málim etken bolatyn.
