Nur-Sultanda Ulttyq sport ýnıversıteti ashylady – QR UOK prezıdenti
NUR-SULTAN. QazAqparat – QR Ulttyq olımpıada komıtetiniń prezıdenti Tımýr Qulybaev Nur-Sultanda Ulttyq sport ýnıversıtetin ashý kózdelip otyrǵanyn málim etti, dep habarlaıdy QazAqparat tilshisi.
«Biz Nur-Sultan qalasynda Ulttyq Olımpıada komıteti arqyly alǵa Ulttyq sport ýnıversıtetin qurýdy maqsat etip otyrmyz. Mundaı naqty maqsat bar. Alaıda ókinishke qaraı dál qazirgi ýaqytta qarjylandyrý máselesi sheshilgen joq. Mundaı máseleni qarastyrý boıynsha Memleket basshysy tapsyrma berip qoıǵan. Álbette, mundaı ulttyq Joǵary oqý ornynyń bazasynda ǵylymı jumystar júrgiziledi. Jetistikke jetken ár sportshynyń daıyndyǵyn, psıhıkasyn zertteıtindeı ǵylym bolýy kerek. Bapkerler osy rette oqýlyq ázirleýi tıis. Sebebi, boksty alyp qaraǵannyń ózinde bizde biregeı jetistikterdi toptastyryp, oqýlyq retinde shyǵarýǵa tolyq múmkindik bar», - dedi Tımýr Qulybaev Qazaqstan boks federatsııasynyń otyrysynda.
Onyń aıtýynsha, oblys ortalyqtarynda sport kolledjderin ashý týraly úkimettik deńgeıde tapsyrma bar.
«Sportshylar osy kolledjderdiń bazasynda oqyp, teorııalyq bilim alyp, sonymen qatar, bolashaqtaǵy mamandyǵyn birge oqyp alyp júrýi tıis. Oblys ortalyqtaryndaǵy barlyq sportshylar halyqaralyq deńgeıge shyǵa almaýy múmkin. Sportshylardyń kóbi jasóspirim shaqtan eresektikke ótken kezde bolashaǵy týraly oılana bastaıdy. Bapkerlerge de jumys tabylary anyq», - dedi ol.
Eske sala ketsek, Qazaqstan boks federatsııasynyń búgingi otyrysynda Tımýr Qulybaev atalmysh federatsııa basshylyǵynan ketetinin málimdegen bolatyn.
Onyń ornyna belgili qazaqstandyq bıznesmen Keńes Raqyshev saılandy.
