Nur-Sultanda Túrkistan óńiri sharýalarynyń jármeńkesi ótip jatyr
NUR-SULTAN. QazAqparat – 16 tonna et, 23 tonna sút pen 5 tonna balyq ónimderi, 50 tonna kókónis pen 25 tonna jemis-jıdek... Túrkistandyq sharýalar bul jolǵy jármeńkede 123 mln teńgeniń ónimin elordalyqtarǵa eshbir alypsatarsyz tıimdi baǵamen usynyp jatyr, dep habarlaıdy QazAqparat tilshisi.
Elordada jazdyń sońǵy kúni jel kóterilip, kún sýytsa da, jármeńkege aǵylǵan halyqtyń qarasy mol. Erte kelip, et pen súttiń, qaýyn-qarbyz ben júzimniń eń táttisin alyp qalýǵa asyqqan jurt qap-qap azyq-túlikti kóligine tıep alyp jatyr. Jármeńkege ánshi Zattybek Kópbosynulynyń kelip, án salýynyń ózi de jurtshylyqtyń kóńil-kúıin kóterip tastady.
Túrkistan oblystyq Aýyl sharýashylyǵy basqarmasynyń basshysy Nurbek Badyraqovtyń aıtýynsha, túrkistandyq sharýalar bıyl jármeńkeni osymen úshinshi ret ótkizýde.
«Jalpy, Nur-Sultan qalasynyń azyq-túlik beldeýin qalyptastyrý jónindegi is-shara josparyna sáıkes, Túrkistan oblysynyń ákimdigi bıyl elordada úshinshi ret aýylsharýashylyq jármeńkesin uıymdastyryp otyr. Oǵan jalpy 40-qa jýyq agroqurylymdar 123 mln teńgeniń 275 tonna ónimin ákeldi. Bul naryqtaǵy baǵamen salystyrǵanda 10-15 paıyzǵa arzan. Sharýalar Túrkistan oblysynyń barlyq aýdandarynan keldi», - deıdi ol.
Basqarma basshysynyń sózine qulaq assaq, óńir jármeńkesi Konstıtýtsııa men bilim kúni merelelerimen tuspa-tus kelgendikten, qalalyqtarǵa arnaıy kontserttik baǵdarlama usynylǵan. Jalpy, búgingi is-sharaǵa 16 tonna et, 23 tonna sút jáne 5 tonna balyq ónimderi, 50 tonna kókónis, 48 tonna baqsha ónimderi, sondaı-aq 25 tonna jemis-jıdek ákelingen.
Nurbek Badyraqovtyń aıtýyna qaraǵanda, osy ýaqytqa deıin túrkistandyqtar 1 maýsymda jáne 22-23 maýsymda eki márte aýylsharýashylyq jármeńkesin ótkizip ketken.
«Bul jerde sharýa tikeleı satyp alýshymen jumys júrgizedi. ıAǵnı, ortada eshqandaı alypsatar joq. Ortada alypsatarlar bolmaǵandyqtan, baǵa arzan ári bizdiń sharýalar da qaıda ótkizemin dep basyn qatyrmaıdy. Tikeleı jármeńkege kelip, ónimin sata alady. Nur-Sultan qalasynyń turǵyndarynyń túrkistandyq ónimderge suranysy joǵary. Jármeńkeniń ótetini jaıly aldyn ala elordalyqtarǵa habarlaımyz. Sonyń nátıjesinde aýyl sharýashylyǵy jármeńkelerinde ónimderimiz 90-95 paıyzdyq deńgeıde ótip ketip jatyr», - dep túıdi Nurbek Badyraqov.
Jármeńkede azyq-túlikpen birge mektep formalary, keńse taýarlary, otandyq aıaq kıimder, erlerdiń kostıýmderi men jumys kıimderi usynylǵan. Qala turǵyndary men qonaqtaryna kóterińki kóńil-kúı syılaý úshin Ordabasay, Jetisaı aýdandarynyń ónerpazdary arnaıy qurylǵan sahnada kontsert ótkizýde.
