Nur-Sultanda Túrkistan oblysynyń azyq-túlik jármeńkesi ótedi
NUR-SULTAN. QazAqparat - Túrkistan oblysynan Nur-Sultan qalasyna aýylsharýashylyq ónimderi tıelgen 34 júk kóligi jol tartty. Jármeńke 5 jáne 6 qyrkúıek kúnderi ótedi, dep habarlaıdy QazAqparat.
Túrkistan oblysynyń Óńirlik kommýnıkatsııalar qyzmetinen málim etkendeı, óńir ákimdiginiń muryndyq bolýymen ótkiziletin jármeńkege 447,2 tonna aýyl sharýashylyǵy ónimderi jóneltildi.
Atap aıtqanda, azyq-túlik tıelgen 34 júk kóliginde 267,7 tonna kókónis, baqsha, kartop, 29,5 tonna jemis-jıdekter, 72 tonna et jáne et ónimderi, 47,5 tonna sút ónimderi, 10 tonna balyq, 6 tonna ásel, 14,5 tonna jemis shyryny men konservi ónimderi bar. Bul taýarlar elordalyqtarǵa naryqtaǵydan 15-20 paıyzǵa tómen baǵada satylatyn bolady. Máselen, negizgi ónimder retinde sıyr etiniń kelisi 1700-1800 teńge, qaýyn-qarbyz 75-100 teńge, kókónis ónimderiniń baǵasy 100-150 teńge bolyp bekitilgen.
«Bıylǵy jyly agroqurylymdarǵa barynsha memlekettik qoldaý kórsetildi. Atap aıtqanda, naryqtaǵymen salystyrǵanda 20 teńgege arzandatylǵan baǵamen kóktemgi dala jumystaryn júrgizýge 37,0 myń tonna, kúzgi dala jumystaryn júrgizýge 39,2 myń tonna janarmaı bólindi.
Oblystyń tabıǵı klımattyq ereksheligine oraı, erte pisetin baqsha, kókónis, kartop ónimderin jınaý qarqyndy túrde júrgizilýde. Aldyn ala jasalynǵan esep boıynsha bıyl 2,8 mln tonna kókónis, baqsha, kartop ónimderin jınaý kútilip otyr. Búgingi kúnge 2,4 mln tonna jınaldy.
Aıta keteıik, osy azyq-túlik taýarlarynyń baǵasyn negizsiz kótermeý jáne sharýalarǵa qoldaý kórsetý maqsatynda Memleket basshysynyń tapsyrmasymen «Egis alańynan – dúken sóresine deıin» pılottyq jobasy bastaldy. Jobany júzege asyrý úshin Úkimet rezervinen 1 mlrd teńge qarjy bólindi», - delingen aqparatta.Elordada aýylsharýashylyq jármeńkesi «Han-Shatyr» saýda, oıyn-saýyq ortalyǵynyń janynda ótedi.
