Nur-Sultanda tún jarymynda jumys istegen SPA salon men kafe-bar anyqtaldy

NUR-SULTAN. QazAqparat – Polıtseıler, ákimdik jáne qalalyq orta sapasy jáne baqylaý basqarmasy ókilderinen quralǵan mobıldi toptar karantın erejesin buzý faktilerin anyqtaýdy jalǵastyryp jatyr, dep habarlaıdy QazAqparat Nur-Sultan qalasynyń Polıtsııa departamentine silteme jasap.

Ótken túni mobıldi top 175 kásipkerlik sýbektisin tekserdi. Tekserý barysynda karantın tártibin buzǵan 9 mekeme anyqtaldy. Olardyń ishinde dúken, kafe-bar jáne spa salondar bar.

Bekturov kóshesinde ornalasqan «Sabai» spa-salony karantın erejelerine qaramastan jumys ýaqytynyń tártibin buzyp, túngi 23:50-de birneshe áıeldi qabyldaǵan.

Klıentterden bólek, salonda jumysshylar, ákimshi jáne mekemeniń dırektory bolǵan.

Salonnyń ıesine qatysty jınalǵan materıal QR ÁQBtK 425-baby boıynsha ákimshilik is qozǵaý úshin Qalalyq orta sapasy jáne baqylaý basqarmasyna jiberildi.

Nur-Sultan qalasynyń polıtsııa departamenti kásipkerlerdi karantın erejesine jaýapkershilikpen qaraýǵa jáne ony saqtamaǵan jaǵdaıda sot sheshimimen mekemeniń qyzmeti toqtatylýy múmkin ekenin eskertedi.