Nur-Sultanda týberkýlezge qarsy 4 myńnan astam adam tekserildi
NUR-SULTAN. QazAqparat – 2018 jyldan bastap elordada týberkýlezdiń dárige tózimdi túrlerimen aýyratyn naýqastardy jańa preparattarmen emdeý shemalary bastaldy. Qalalyq ftızıopýlmonologııa ortalyǵynyń dırektory Anna Tsepkeniń aıtýynsha, bul týberkýlezdiń dárige tózimdi, buryn emdelmeıtin túrlerin emdeýdiń tıimdiligin arttyrdy, dep habarlaıdy QazAqparat.
«Nur-Sultan qalasy polıtsııa departamentiniń qoldaýymen turǵylyqty jeri joq (alkogol men esirtkige táýeldi úısiz adamdar, bas bostandyǵynan aıyrý oryndarynan kelgen) adamdardy flıýorografııalyq tekserý boıynsha birlesken aktsııalar ótkizdi. Aktsııa barysynda barlyǵy 4 554 adam týberkýlezge profılaktıkalyq tekserýmen qamtyldy, onyń 104-i – turǵylyqty jeri joq adamdar», - dedi Anna Tsepke elorda ákimdiginde ótken onlaın brıfıngte.
Qazirgi ýaqytta pandemııa jaǵdaıynda týberkýlez kúdigi týraly shaǵymdardy ýaqytyly anyqtaý maqsatynda «joǵary qaýip» tobyndaǵy adamdarǵa qashyqtan konsýltatsııalar berý úshin tsıfrlyq tehnologııalar keńinen qoldanylyp jatyr. Aýrýhanaǵa jatqyzýdy qajet etpeıtin naýqastar úshin mobıldi brıgadanyń kómegimen úıde emdeý nemese beınebaqylaý emi sekildi ambýlatorııalyq emdeý túrleri belsendi damýda.
«2018 jyly Nur-Sultan qalasynda alǵashqylardyń biri bolyp týberkýlezge qarsy jańa preparattardy: bedakvılın men delamanıdti qoldaný arqyly týberkýlezdiń dárige tózimdi túrlerimen aýyratyn naýqastardy emdeý bastaldy. Búginde bul týberkýlezdiń dárige tózimdi, buryn emdelmeıtin túrlerin emdeý tıimdiligin edáýir arttyrýǵa múmkindik berdi», - deıdi A. Tsepke.
Aıta keteıik, sońǵy on jylda elordada týberkýlez aýrýy men týberkýlezden bolatyn ólim-jitim 5 esege azaıdy.
2021 jyldyń 24 aqpanynan 24 naýryzyna deıin «Ýaqyt ótip jatyr!» uranymen týberkýlezdiń aldyn alý aılyǵy qolǵa alyndy.
