Nur-Sultanda týberkýlez aýrýy bes ese azaıdy
NUR-SULTAN. QazAqparat – Sońǵy on jylda elordada týberkýlez aýrýy men týberkýlezden bolatyn ólim-jitim 5 esege azaıdy. Bul týraly qalalyq Qoǵamdyq densaýlyq saqtaý basqarmasy basshysynyń mindetin atqarýshy Álııa Rústemova aıtty, dep habarlaıdy QazAqparat tilshisi.
«2010 jyly týberkýlezdiń 765 jańa jaǵdaıy tirkelse, 2020 jyly – bul kórsetkish 393 jaǵdaıǵa deıin tómendegen. Týberkýlezge qarsy qyzmettiń jetistikteri qaladaǵy medıtsınalyq uıymdardyń jáne qalanyń kóptegen bólimderi men qurylymdarynyń júıeli qyzmetimen baılanysty», - dep tolyqtyrdy Álııa Rústemova.
Qazirgi ýaqytta elordada alǵashqy medıtsınalyq-sanıtarlyq kómek uıymdarynda qala turǵyndaryn profılaktıkalyq flıýorografııalyq tekserýden ótkizý úshin 16 statsıonarlyq jáne 4 jyljymaly flıýorografııalyq qondyrǵy bar.
«Týberkýlezdi dıagnostıkalaýdyń sezimtal gendik-molekýlalyq ádisteriniń kómegimen týberkýlez bolýy yqtımal patsıentterdi tekserý úshin Nur-Sultanda tórt apparat bar: onyń úsheýi medıtsınalyq-sanıtarlyq kómek uıymdarynda jáne bireýi qalalyq ftızıopýlmonologııa ortalyǵynda tur. Bul zertteý eki-úsh saǵat ishinde patogenniń bolýyn anyqtaýǵa jáne dárilerge sezimtaldyqtyń bar-joǵyn anyqtaýǵa múmkindik beredi», - deıdi Á. Rústemova.
Sonymen birge, spıker ambýlatorııalyq deńgeıde em qabyldap jatqan týberkýlezben aýyratyn naýqastarǵa kórsetiletin áleýmettik qoldaý týraly aıtyp berdi. Buǵan deıin kómek azyq-túlik paketteri men jol kartalaryn bólý túrinde bolsa, 2019 jyldyń ekinshi jartysynan bastap – 10 AEK (29 170 teńge) mólsherinde aı saıynǵy aqshalaı tólemder beriledi.
