Nur-Sultanda toı toılaý tyıylar emes
NUR-SULTAN. QazAqparat – Ótken demalys kúnderi elordada karantın rejımin buzǵan 10 nysan anyqtaldy. Bul týraly Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.
Vedomstvo aqparatyna sáıkes, quramynda ákimdiktiń, Nur-Sultan qalalyq Sanıtarııalyq-epıdemıologııalyq baqylaý departamentiniń ókilderi, polıtsııa qyzmetkerleri bar mobıldi top karantın sharalarynyń saqtalýyn qadaǵalaý úshin júzden astam kásipkerlik sýbektisin tekserip shyqqan. Nátıjesinde karantın rejımin buzǵan meıramhana, dámhana-bar, dúken syndy 10 nysandy anyqtaǵan.
«Atap aıtqanda, Balqantaý kóshesi boıyndaǵy «Baqsaraı» meıramhanasyn tekserý barysynda eki kún qatarynan 50 jasqa tolý mereıtoıy men úılený toıynyń ótkeni anyqtaldy. Birinshi kúni qoldanystaǵy tyıymǵa qaramastan, meırahana zaly qonaqtarǵa lyq toly bolǵan jáne karantın sharalary saqtalmaǵan. 80-nen astam qonaq án salyp, bı bılep, shekteýlerdi elemeı kóńil kótergen. Ekinshi kúni de dál osy jerde úılený toıy ótip jatqan. Mobıldi top kelgennen keıin toıǵa jınalǵandar tez arada tarap ketti», - delingen departament aqparatynda.
Shekteý sharalaryn buzǵandardyń ústinen materıal jınaqtalyp, QR Ákimshilik quqyq buzýshylyq týraly kodekstiń 425-babymen olardy jaýapqa tartý úshin qalalyq Sanıtarııalyq-epıdemıologııalyq baqylaý departamentine jiberildi.
