Nur-Sultanda TMD-ǵa múshe memleketterdiń ART-EXPO halyqaralyq kórmesi ashyldy

NUR-SULTAN. QazAqparat – TMD-ǵa múshe memleketterdiń eleýli jetistikteri, iri jobalary, mańyzdy oqıǵalary, mádenı is-sharalary jáne sýretshileri men qoldanbaly óner sheberleriniń elektrondy ónimderi. Munyń bárin Ulttyq mýzeıde ótip jatqan TMD-ǵa múshe memleketterdiń ART-EXPO halyqaralyq kórmesinen tamashalaýǵa bolady, dep habarlaıdy QazAqparat Mádenıet jáne sport mınıstrligine silteme jasap.

«Qazaqstan Prezıdenti Qasym-Jomart Toqaev 2022 jyldy «TMD-nyń halyq shyǵarmashylyǵy men mádenı murasy jyly» dep jarııalady. Búgingi «ART keńistigindegi halyq shyǵarmashylyǵy» kórmesi osy ıdeıany júzege asyrý aıasynda ótip jatyr. Elder arasyndaǵy mádenı baılanys belsendi damyp keledi, el azamattary bir-biriniń rýhanı murasyna shynaıy ózara qyzyǵýshylyq tanyta bastady. Búgin kórmeni asha otyryp, Sizderdiń nazarlaryńyzǵa Qazaqstan, Ózbekstan, Reseı, Tájikstan jáne Belarýs sýretshileriniń, músinshileriniń, qoldanbaly óner sheberleriniń shyǵarmashylyq jumystarymen jaqynyraq tanysýdy usynamyz. Kórmege qoıylǵan eksponattar kelýshilerdiń júregin jaýlap, umytylmas áser qaldyratynyna bek senimdimin», - dedi mádenıet jáne sport mınıstri Dáýren Abaev.

Qazaqstan pavılonynda otandyq qoldanbaly óner sheberleriniń qatysýymen toqyma óneri, qysh isi jáne zergerlik buıymdar jasaýǵa arnalǵan sheberlik sabaqtary ótedi. Budan basqa, TMD-ǵa qatysýshy memleketterdiń múddeli qurylymdary men mádenıet uıymdary arasynda shyǵarmashylyq baılanys ornatý maqsatynda olardyń halyq shyǵarmashylyǵy salasyndaǵy jetistikteri tanystyryldy.

Sondaı-aq, is-shara aıasynda TMD-ǵa múshe memleketterdiń mádenı yntymaqtastyq jónindegi Keńesiniń otyrysy, birqatar ekijaqty kezdesýler ótkizý josparlanǵan.

ART EXPO – TMD sheńberindegi yntymaqtastyqty damytýǵa, ultaralyq kelisimdi nyǵaıtýǵa, basqa halyqtardyń mádenıetine, dástúrine qurmet kórsetýge baǵyttalǵan keshendi is-shara. Halyqaralyq kórme 10 qyrkúıekke deıin jalǵasady.

Foto: gov.kz