Nur-Sultanda TMD elderiniń bas prokýrorlary jıyn ótkizýde
«QR Bas prokýrory Ǵızat Nurdáýletovke búgingi is-sharany uıymdastyryp, qazaq jerinde jyly shyraımen qarsy alǵany úshin jáne keńestiń barlyq músheleriniń jeke kezdesýine múmkindik bergeni úshin erekshe rızashylyǵymdy bildirgim keledi. Pandemııanyń shıelenisken jaǵdaıynda kópten kútken bul kezdesý QR Bas prokýratýrasy men Úılestirý keńesi hatshylyǵynyń ujymdarynyń úılesimdi jumysynyń arqasynda múmkin boldy. Bul bizdiń yntymaqtastyqty odan ári damytýǵa jáne ózekti máselelerdi birlesip sheshýge baǵyttalǵanymyzdyń dáleli», - dedi Reseı Federatsııasynyń Bas prokýrory Igor Krasnov otyrysty asha otyryp.
Óz kezeginde QR Bas prokýrory Ǵızat Nurdáýletov osy baǵyttaǵy birlesken jumystyń mańyzdylyǵyn atap ótti.
«Elderimizdegi koronavırýs jaǵdaıynyń turaqtanýy is-sharany dástúrli formatta ótkizýge múmkindik berip otyr. Men barshańyzdy esen-saý kórgenime qýanyshtymyn. Otyrys jumysyna Táýelsiz Memleketter Dostastyǵyna qatysýshy memleketterdiń bas prokýratýralarynyń delegatsııalary qatysýda», - dep atap ótti QR Bas Prokýrory.
Sondaı-aq, ol bıyl TMD-ǵa múshe memleketterdiń kóbi el táýelsizdiginiń 30 jyldyǵyn toılap jatqanyn eske saldy.
«Bıyl aramyzda kóptegen elder Táýelsizdiktiń 30 jyldyǵyn atap ótip jatyr. Osy jyldar ishinde biz zańdylyqty nyǵaıtý jáne qylmysqa qarsy kúres isinde mańyzdy baǵyttar boıynsha baılanysymyzdy ydyratpaı, jemisti yntymaqtastyq ornattyq», - dep túıindedi Ǵızat Nurdáýletov.
