Nur-Sultanda tek ruqsat berilgender ǵana kólik jýý qyzmetin paıdalanady
Bul týraly Nur-Sultan qalasy Taýarlar men qyzmetterdiń qaýipsizdigi men sapasyn baqylaý departamenti Jumys orny men kommýnıkatsııalyq nysandardaǵy juqpaly aýrýlar boıynsha qadaǵalaý bóliminiń basshysy Gúlnar Qalıeva aıtyp berdi.
«Kólik jýý oryndaryna karantınde qala ishinde júrýge ruqsaty bar kólikter ǵana bara alady. Jedel shtabtyń 28 naýryzdaǵy sheshimimen kóshede júrýdiń negizgi tártibi bekitilgen», - dep atap ótti G. Qalıeva «Atameken» ulttyq kásipkerler palatasy júrgizgen onlaın brıfıngte.
Sonymen birge, spıker hımııalyq tazalaý oryndarynyń jumys tártibin túsindirdi.
«Saǵat 9:00-18:00 aralyǵynda jaqyn mańdaǵy hımııalyq tazalaý núktesine barýǵa bolady. Nemese keıbir oryndar buıymdy úıden alyp ketip, tazartqan soń qaıta jetkizip beredi. Bolmasa tek jaqyn ornalasqan hımııalyq tazartýǵa barýǵa ruqsat. Qala ishindegi polıtsııa úıden shyǵýyńyzdyń sebebin muqııat tekseredi», - dedi ol.
Buǵan deıin Gúlnar Qalıeva 20 sáýirden bastap qaıta ashylatyn kásiporyndarǵa qandaı talap qoıylatynyn túsindirgen edi.
foto: openbusiness.ru