Nur-Sultanda «Táýelsizdiktiń tól qurdastary» jobasy bastaldy

NUR-SULTAN. QazAqparat - «Nur-Sultan qalasy Jastar saıasaty máseleleri basqarmasy» MM bastamasymen Qazaqstan Respýblıkasy Táýelsizdiginiń 30 jyldyq mereıtoıy aıasynda «Táýelsizdiktiń tól qurdastary» jobasy bastaldy, dep habarlaıdy QazAqparat qala ákimdiginiń resmı saıtyna silteme jasap.

Táýelsizdik qurdastary jyl boıy ata-anasynyń qamqorlyǵynan aıyrylǵan balalarǵa tálimgerlik jasaýmen, múmkindigi shekteýli balalarǵa trenıngter men tanymdyq ekskýrsııa uıymdastyrý sııaqty qaıyrymdylyq istermen aınalysady. Sonymen qatar áleýmettik az qamtylǵan otbasylarǵa kómek kórsetý jáne azyq-túlik sebetterin taratý sharasy josparlanǵan.

«Búgin táýelsizdik qurdastary atynan birinshi sharany bastap jatyrmyz. Óz atymyzdan 30 shaqty áleýmettik az qamtylǵan otbasyny azyq-túlikpen qamtamasyz etemiz degen nıettemiz. Alda bul bastamany ary qaraı damytý oıymyzda bar. Ózim óner salasynda jumys istegendikteǵ jaǵdaıy tómen otbasylardaǵy balalardy ónerge baýlýǵa tyrysamyn», – dedi Erjan Sansyzbaev.

Onyń aıtýynsha «Táýelsizdik qurdastary» degen qoǵamdyq qor qurylady. Qordyń basty maqsaty - qaıyrymdylyqpen aınalysyp, jaǵdaıy tómen, az qamtylǵan, kópbalaly otbasylarǵa kómek qolyn sozý.

Atalǵan qaıyrymdylyq jobaǵa Nur-Sultan qalasy ákimdiginiń memlekettik akademııalyq fılarmonııasynyń solısi, elordanyń belsendi jastarynyń biri Altynshash Muqataeva da qatysady.

«Táýelsizdiktiń 30 jyldyǵyna oraı, táýelsizdiktiń qurdasy retinde «30 ıgi is» qaıyrymdylyq jobasyn qolǵa aldyq. Biz shamamyz jetkenshe kópbalaly, múmkindigi shekteýli jáne az qamtylǵan otbasylarǵa syılyqtarymyzdy usynbaqpyz. Bul sharany tek elorda jastary bastap otyrmyz. Endigi maqsatymyz -Táýelsizdiktiń qurdasy sanalatyn elimizdiń ózge óńirindegi jastarǵa estafeta retinde joldaý. Táýelsizdik merekesi toılanyp qana qoımaı, qaıyrymdy isterge, úlken jobalarǵa aınalsa degen úmitimiz bar», – dedi ol.