Nur-Sultanda talantty jastar «Elbasy medalimen» marapattaldy
«Búgin erekshe kún. Talantty jastarmen júzdeskenime qýanyshtymyn. Sizder mektep, aýdan, qala ǵana emes el kóleminde óz talanttaryńyzdy tanytyp otyrsyzdar. Sizder júzdegen darynnyń ishinen úzdik atanyp otyrsyzdar. Búginde elimizde 14 pen 29 jas aralyǵynda 4 mln-ǵa jýyq jas býyn bar bolsa, sizder solardyń arasynan óz talanttaryńyzben erekshelenip otyrsyzdar. Osy sekildi jastarǵa serpin beretin jobalardyń qatary kóbeıe bersin. Búgingi jobamen shektelmeı basqa da sharalarǵa belsene qatysyp múmkindikterdi paıdalanǵan jón», - dedi QR Parlamenti Májilisiniń depýtaty Mádı Ahmetov «Elbasy medalin» tabys etý saltanatty sharasynda.
Joba jeti baǵyttan turady. Atap aıtqanda, sport, daryn men daǵdy, kitap oqý, ulttyq mura, volonterlik, saıahattar men joryqtar jáne eńbek tájirıbesi. Jáne jobaǵa qatysýshylar 6 aıdan 18 aıǵa deıin ózi tańdaǵan sala boıynsha belgili tapsyrmalardy oryndaıdy.
Búgingi sharada Nur-Cultan qalasy men Aqmola oblysynan qatysqan 27 jas darynǵa «Elbasy medali» tabys etildi.
«Ózderińiz biletindeı, QR Tuńǵysh Prezıdenti – Elbasy Nursultan Nazarbaev jastarǵa arnalǵan jobalarǵa erekshe mán berip, basa nazar aýdarady. Sonyń dáleli 2019 jyly «El Úmiti» jobasy ázirlendi. Atalǵan joba jastardy keshendi damytýǵa baǵyttalǵan ulttyq deńgeıdegi jalǵyz baǵdarlama deýge bolady. Onyń aıasynda «Myń bala», «Qabilet» jobalary qolǵa alyndy jáne búgin qorytyndylanyp otyrǵan «Elbasy medali» jobasy. Bul jobaǵa elimizdiń 14 pen 29 aralyǵyndaǵy jastar qatysa alady. Jobaǵa osy kúnge deıin elimizdiń ár óńirinen 20 myńǵa jýyq jas býyn qatysyp, olardyń 4 myńy kúmis jáne qola medal ıegeri atandy. Búgingi jeńimpazdardy shyn júrekten quttyqtaımyn. Osymen shektelmeı alda budan da bıik asýdy baǵyndyra berińizder - deıdi «Elbasy Akademııasynyń» basqarýshy dırektory Ánýar Janǵozın.
Joba avtorlarynyń aıtýynsha, atalǵan medal ıegerleri otandyq joǵary oqý oryndaryna bilim granttaryn taǵaıyndaý kezinde artyqshylyqqa ıe bolady. ıAǵnı talapkerlerdiń UBT baldary teń bolǵan jaǵdaıda, Elbasy medaliniń ıegerine basymdyq beriledi.
«Men úshin búgin óte erekshe kún, sebebi alǵashqy medalimdi aldym. Bul marapatpen qatar maǵan úlken jaýapkershilik artylǵanyn sezinemin. Eńbegimniń baǵalanǵanyna qýanyshtymyn. Jobaǵa qatysýdyń arqasynda elimizdiń mádenı murasyn zerttep, otandyq shyǵarmalarmen jaqynyraq tanysa aldym», - dedi medal ıegeri L. N. Gýmılev atyndaǵy EUÝ stýdenti Dınara Oralbekova.
Bıyl elimiz boıynsha 605 «Elbasy medali» ıegeri bilim granttaryna ıe bolǵan jáne olardyń 30%-dan astamy aýyl mektepteriniń túlekteri.
