Nur-Sultanda taksı júrgizýshisi jalǵa alynǵan kólikterdiń katalızatoryn urlaǵan

NUR-SULTAN. QazAqparat – Saryarqa aýdandyq polıtsııa bóliminiń krımınaldyq polıtsııa qyzmetkerleri jedel izdestirý is-sharalary kezinde katalızator urlady degen kúdikpen 39 jastaǵy turǵyndy ustady, dep habarlaıdy QazAqparat Nur-Sultan qalasy PD baspasóz qyzmetine silteme jasap.

«Taksı júrgizýshisi «Smart taksı» JShS-ne tıesili «Chevrolet Cobalt» avtokólikterinen katalızatoryn urlap ketken. Eki kúnniń ishinde árqaısysynyń quny 830 myń teńge bolatyn úsh avtomobıl katalızatoryn qoldy etti. Urlanǵan katalızatorlardy metall qabyldaý ornyna tómen baǵamen ótkizgen. Júrgizýshiniń avtokólikterdi TQS-ǵa aparǵany jáne onda avtomehanıkter aqysyna katalızatorlardy kesip bergenderi anyqtaldy», - delingen departament málimdemesinde.

Sotqa deıingi tergeý amaldary júrgizilip jatyr. Kúdikti kinásin moıyndaǵan. Onyń elorda aýmaǵynda buryn jasalǵan osyǵan uqsas qylmystarǵa qatystylyǵy tekseriledi.