Nur-Sultanda taǵy bir saýda ortalyǵynda vaktsınatsııa pýnkti ashyldy
NUR-SULTAN. QazAqparat – Elordada «Saryarqada» saýda, oıyn-saýyq ortalyǵynda koronavırýs ınfektsııasyna qarsy vaktsınalaý pýnkti ashyldy, dep habarlaıdy QazAqparat qala ákimdigine silteme jasap.
«Saýda ortalyqtarynda vaktsınatsııa pýnkterin uıymdastyrý jurt arasynda ekpege degen suranysty kórsetedi. Qazirgi ýaqytta qaladaǵy 9 saýda kesheninde 15 myńǵa jýyq adam vaktsına aldy. Qala turǵyndary úıine, jumysyna jaqyn jerde egý pýnkterin ashý týraly jıi júginedi. Osylaısha, biz halyqqa yńǵaıly bolý úshin qalanyń barlyq iri saýda núktelerin qamtyp otyrmyz», - dep atap ótti Qoǵamdyq densaýlyq saqtaý basqarmasynan.
Qala boıynsha vaktsınanyń birinshi komponentin 132 myńnan astam adam aldy.
«Saryarqa» SOO-daǵy egý pýnkti ekinshi qabattaǵy eskalatordyń oń jaǵynda ornalasqan. Jumys kestesi vaktsınatsııa kabınetteri uıymdastyrylǵan ózge SOO-larǵa uqsas – saǵat 10:00-den 22:00-ge deıin.
Búginde elordada «Mega Silk Way», «Keruen», «Han Shatyr», «Abý-Dabı Plaza», «Azııa Park» saýda, oıyn-saýyq ortalyqtarynda, «Bıg Shanhaı» saýda kesheninde, ortalyq bazarda, «Álem» jáne «Astanalyq» saýda ortalyqtarynda vaktsınatsııa pýnkteri jumys istep tur.
Vaktsınatsııa pýnkteriniń keńeıýine baılanysty bastapqy medıtsınalyq-sanıtarlyq kómek uıymdarynyń jumys ýaqyty qysqaryp, 08:00-22:00 aralyǵyna belgilense, SOO-lar úshin jumys tártibi ózgerissiz qalady – saǵat 10:00-den 22:00-ge deıin.
Sondaı-aq, halyqtyń joǵary belsendiligin eskere otyryp, Qoǵamdyq densaýlyq saqtaý basqarmasy kóshpeli brıgadalar uıymdastyryp, eńbek ujymdaryn jappaı vaktsınalap jatyr.
