Nur-Sultanda syrǵanaqta oınap júrgen 5 jasar bala saýsaǵynnan aıyryldy
NUR-SULTAN. QazAqparat – Elordada aýlalardyń birinde 5 jasar bala jaraqat alyp, saýsaǵyna ampýtatsııa jasaldy. Syrǵanaq bólshektelip, aýladan shyǵaryldy, dep habarlaıdy QazAqparat.
«25 sáýir kúni keshke 4 jastaǵy bala aýrýhanaǵa tústi. Anasynyń aıtýynsha, bala syrǵanaqtan túsý kezinde saýsaǵyn qysyp alǵan. Saldarynan sol qolyndaǵy shyldyr shúmek saýsaǵynyń ústińgi jaǵyna ampýtatsııa jasaldy. Travmatologııalyq pýnkt deńgeıinde jarany alǵashqy hırýrgııalyq óńdeý júrgizildi, tuqyl jasalyp, gıps salyndy. Bala ambýlatorııalyq emdelýge jiberildi», - dep jaýap berdi elordalyq Densaýlyq saqtaý basqarmasy agenttik saýalyna.
Atalǵan oqıǵa elordanyń Baıqońyr aýdanyndaǵy Kenshiler kóshesi, 2 úı meken-jaıynda bolǵan jáne aýdan ákimdigi zardap shekken balanyń otbasyna kómek kórsetken.
«Búgingi tańda «Baıqońyr» aýdanynyń ákimdigi balanyń otbasyna barlyq qajetti medıtsınalyq jáne materıaldyq kómek kórsetedi. Sondaı-aq, oqıǵa ornyndaǵy syrǵanaq bólshektelip, aýmaqtan shyǵaryldy. Qazir kúnniń jylýyna baılanysty balalardyń barlyǵy aýlaǵa shyǵady. Sol sebepti ata-analarǵa men balalardy qyraǵy bolýǵa, balalarǵa qaýipsizdik erejeleri týraly aıtýǵa shaqyramyz», - dep habarlady Baıqońyr ákimdiginiń baspasóz qyzmeti.
