Nur-Sultanda synyptaǵy bala sanyn azaıtý máselesi qaralyp jatyr

NUR-SULTAN. QazAqparat – Elordada offlaın rejımde oqıtyn synyptardaǵy bala sany azaıtylýy múmkin. Bul týraly Nur-Sultan qalasynyń bas memlekettik sanıtar dárigeri Sarhat Beısenova aıtyp berdi, dep habarlaıdy QazAqparat tilshisi.

«Nur-Sultan 10 naýryzdan beri «qyzyl aımaqta» tur. Biz jańa toqsannan bastap synyptaǵy bala sanyn azaıtý máselesin qarastyrdyq. Ásirese joǵary synyptarda – 15 balaǵa deıin jáne tómengi synyptarda eger «qyzyl aımaqta» qalatyn bolsaq, besinshi synypqa deıin bala sanyn azaıtý máselesi qaralady. Balalar kanıkýlǵa shyqqan kezde bul másele talqylanyp jatyr», - dedi S. Beısenova elorda ákimdiginde ótken onlaın brıfıngte.

Aıta keteıik, elordada qashyqtan oqıtyndar arasynda KVI juqtyrý jaǵdaıy kóbeıgen.

Oqý jylynyń basynan 25 naýryzǵa deıingi COVІD-19 jaǵdaıy boıynsha oqýshylar arasynda 1590 jaǵdaı tirkeldi.

Onyń ishinde offlaın rejımde oqýshylar arasynda 30,6% (1103 jaǵdaı), qashyqtan oqıtyndar arasynda – 69,4%.

Oqý jylynyń basynan beri Nur-Sultan qalasy boıynsha 92 mektep karantınge jabylǵan.

Buǵan deıin Sarhat Beısenova elordadaǵy KVI juqtyrý statıstıkasyn jarııalaǵan edi. Elordada koronavırýs juqtyrǵandar kúnine 150-den 280-ge deıin tirkeledi.