Nur-Sultanda synı oılaý mektebi jumysyn bastady
NUR-SULTAN. QazAqparat - Elordada jastardyń medıa saýattylyǵyn arttyrýǵa baǵyttalǵan «True or False» jobasy bastaldy, sonyń sheńberinde synı oılaý mektebi iske qosyldy, dep habarlaıdy QazAqparat elorda ákimdigine silteme jasap.
Joba qalalyq Qoǵamdyq damý isteri basqarmasynyń bastamasymen júzege asyrylýda. Qazan men qarasha aılary aralyǵynda jastarǵa arnalǵan kıberqaýipsizdik, psıhologııa jáne kommýnıkatsııa salasyndaǵy joǵary bilikti mamandar trenıngter toptamasyn ótkizedi.
Internette usynylǵan aqparatqa synı kózben qaraı bilý adamǵa vırtýaldyq jáne shynaıy álemdi ajyratýǵa kómektesip qana qoımaı, sonymen qatar ǵalamtorda jıi kezdesetin jalǵan aqparatty júregine jaqyn qabyldamaı, óz psıhıkasyn saqtaýǵa kómektesedi.
«Jastar aqparattyń taratylý jyldamdyǵy jáne tehnologııalardyń qarqyndy damýyna daıyn bolýy tıis. Taqyryptyń ózektiligine baılanysty atalmysh joba uıymdastyryldy», – dep atap ótti jobanyń uıymdastyrýshylary.
Jobaǵa qatysý ótinishteri 2019 jylǵy qyrkúıekten bastap 3 qazanǵa deıin qabyldandy. Nátıjesinde 300-ge jýyq úmitkerler tirkeldi, olardyń 62-si orta mektep oqýshysy, 167-si stýdent, 57-i jas maman.
Jalpy úmitkerler arasynan 180 tyńdaýshy tańdaldy. Olar synı oılaý jáne kıber keńistiktegi aqparatty taldaý daǵdylaryn jetildirý boıynsha trenıngtar toptamasyna qatysýǵa múmkindik aldy. Úsh apta ishinde jastar kıberqaýipsizdik jáne kommýnıkatsııa salasyndaǵy jetekshi sarapshylardyń kýrstarynan ótedi. Joba nátıjeleri boıynsha qatysýshylar arasynda medıa saýattylyq boıynsha chempıonat ótkizý josparlanǵan.
