Nur-Sultanda statsıonarlyq karantınde 600-den astam adam jatyr
NUR-SULTAN. QazAqparat - Elordada koronavırýs ınfektsııasyna baılanysty 645 adam aýrýhanaǵa jatqyzyldy, onyń ishinde 62 bala bar. Bul týraly Nur-Sultan qalalyq Qoǵamdyq densaýlyq saqtaý basqarmasynyń basshysy Sáýle Qısyqova málim etti, dep habarlaıdy QazAqparat tilshisi.
«21 naýryzda saǵat 08.00-degi jaǵdaı boıynsha elorda aýrýhanalarynda barlyǵy 645 adam jatyr, onyń 62-si - balalar. Osy ýaqytqa deıin Nur-Sultan qalasynda 28 adamda koronavırýs ınfektsııasy anyqtaldy», - dedi basqarma basshysy qala ákimdiginde ótken onlaın-brıfıngte.
Jas erekshelikteri boıynsha, 18 jasqa deıingi eki naýqas (4 aılyq náreste, 14 jastaǵy jasóspirim), 18-29 jas aralyǵynda - úsh naýqas, 30-49 jas aralyǵynda - 18 naýqas, 50-59 jas aralyǵynda - tórt adam jáne 60 jastan asqan bir naýqas bar.
Buǵan deıin Sáýle Qısyqova 20 naýryz kúni koronavırýs ınfektsııasy anyqtalǵan 3 naýqastyń jaı-kúıin aıtyp berdi. 4 aılyq nárestesi bar otbasy 19 naýryzda Parıj-Mınsk-Nur-Sultan reısinen túsirilip, aýrýhanaǵa jetkizilgen.
