Nur-Sultanda «Shyraıly Shymkent» fotokórmesi ótip jatyr
NUR-SULTAN. QazAqparat - Nur-Sultan qalasyndaǵy «Keruensity» saýda, oıyn-saýyq ortalyǵynda Shymkent qalasy ákimdigi jáne «National Geographic Qazaqstan» jýrnalynyń birlesip uıymdastyrýymen «Shyraıly Shymkent!» atty fotokórme ashyldy.
Kórme maqsaty - kópshilik arasynda Shymkent qalasynyń ishki týrızm áleýetin jan-jaqty kórsete otyryp, ákimdik tarapynan aldaǵy ýaqytta qolǵa alynǵaly otyrǵan jobalardy fotosýret tilimen jetkizý. Aıta keterligi, halyqaralyq ekspedıtsııa quramynda arheolog, geograf, jýrnalısterden bólek, taılandtyq 2 fotografpen birge ár salada mashyqtanǵan onǵa jýyq qazaqstandyq fotosýret óneriniń mamandary boldy. «National Geographic Qazaqstan» jýrnalynyń 13 qyzmetkerinen quralǵan top músheleri aǵymdaǵy jyly mamyrdyń 20-31-i aralyǵynda Shymkent qalasy men qala mańyndaǵy qyryqqa jýyq tarıhı-mádenı oryndar men kıeli jerlerdi aralap shyǵyp, 1,5 myń shaqyrymdyq joldy júrip ótti.
Olar qalanyń eski bóligindegi kóne ǵımarattar, Aqmeshit úńgiri, Saıramdaǵy keseneler shoǵyryn jáne Qasqasý shatqaly sekildi tabıǵaty ásem jerlerdiń tańǵajaıyp kórinisterin taspaǵa tartyp alýǵa múmkindik aldy. Ol fotosýretterdiń birnesheýi jýrnal arqyly álem halqynyń nazaryna usynylatyn bolady.
Kórmege kelýshiler Shymkent qalasy men onyń aınalasynda kórikti jerler, kıeli oryndar, tabıǵı eskertkishter men qarapaıym qala turǵyndarynyń kúndelikti turmys-tirshilikterin baıandaıtyn fotosýretterdiń ár mezgil men ár qyrynan túsirilgen jıyntyǵyn tamashalaı alady.
Fotokórme Shymkent qalasynyń kúnine oraılastyrylǵan. Sharanyń ashylý rásimine Shymkent qalalyq Týrızm basqarmasynyń basshysy Turar Ahmetov, National Geographic redaktsııasynyń músheleri, qalalyq maslıhattyń depýtattary, jeke kásipkerler men sala ardagerleri qatysty.
