Nur-Sultanda PTR zerthanalarynyń qýaty artty
NUR-SULTAN. QazAqparat - Nur-Sultanda kúnine 10 myńǵa jýyq PTR-zertteý júrgiziledi. Pandemııa úı bastalǵaly beri halyqty PTR-testileýmen kóbirek qamtý úshin qaladaǵy zerthanalar sany ekiden 27-ge deıin ósti. Zerthanalardyń qýattylyǵy táýligine 13 myńnan astam zertteýdi quraıdy. Búgingi tańda 1,7 mln-nan astam zertteý júrgizildi, dep habarlaıdy qala ákimdiginiń resmı saıty.
Sondaı-aq, KVI juqtyrǵan patsıentterdi emdeý úshin qolda bar rezervterdiń arqasynda qosymsha ınfektsııalyq tósekter uıymdastyryldy, bul tósek júktemesiniń azaıýyna múmkindik berdi. Eger maýsym aıynyń sońynda kovıdtik tósek-oryn qýaty 14 ınfektsııalyq statsıonar boıynsha 2 myń tósekten sál artyq bolsa, búgingi kúni ınfektsııalyq tósekter sany 3,5 myńǵa deıin ulǵaıdy.
Esterińizge sala keteıik, qazir qala boıynsha COVID-19 vırýsymen kúresý úshin 15 statsıonar jáne 6 myńnan astam medıtsına qyzmetkeri jumyldyryldy.
Sondaı-aq, halyqty KVI-ge qarsy vaktsınatsııalaýdyń oń dınamıkasy baıqalady. Qoǵamdyq densaýlyq saqtaý basqarmasynyń derekteri boıynsha táýligine ortasha eseppen 6-dan 8 myńǵa deıin adam egiledi.
«Osy aptanyń basynan beri qala boıynsha 27 myń azamat vaktsınatsııamen qamtyldy. Ekpe alǵandar sany kúnine 8 myń adamǵa jetedi. Búgingi tańda birinshi komponentpen 308 myńnan astam azamat vaktsınatsııalandy. Bul vaktsınatsııanyń ósip kele jatqan qarqynyn, adamdardyń sanaly túrde densaýlyǵyna jaýapkershilikpen qaraýyn bildiredi», — dep atap ótti qalalyq Densaýlyq saqtaý basqarmasy.
Sondaı-aq, mobıldi toptar eńbek ujymdaryn vaktsınatsııalaýdy jalǵastyrýda. Tek vaktsınatsııa ǵana óz densaýlyǵyńyzdy, jaqyndaryńyz ben aınalańyzdaǵy jandardyń densaýlyǵyn qorǵaýǵa múmkindik beredi.
