Nur-Sultanda polıtseı shaqalaqty órtke oranǵan úıden alyp shyqty
NUR-SULTAN. QazAqparat – Elorda turǵyndary órtenip jatqan úıden jańa týǵan sábıdi alyp shyqqan polıtsııa qyzmetkerine alǵys aıtty, dep habarlaıdy QazAqparat tilshisi QR ІІM baspasóz qyzmetine silteme jasap.
ІІM-nen habarlanǵandaı, 12 tamyzdyń túninde Nur-Sultan qalasyndaǵy turǵyn úı keshenderiniń birinen órt shyqqan. Páter ıesi Janar Sádýaqasqyzy óz úıinde 14 jastaǵy qyzy men jańa týǵan ulymen otyrǵan. Tilsiz jaýdy baıqaǵannan keıin ol birden órt sóndirýshilerge habar berip úlgeredi. Aqyry, óz úıinen ózdiginen shyǵa almaıtynyn ańǵarǵannan keıin esikti ashyq qaldyrǵan kúıi balkonǵa shyǵyp, syrtta júrgenderdi kómekke shaqyra bastaǵan.
«Men ulymnyń aýzyn dymqyl shúberekpen jaýyp qoıdym. Barynsha aýa jutqanyn qaladym. Biraq, úıdi kók tútin alyp ketkennen keıin demalýdyń ózi qıynǵa túse bastady. Janymda 14 jastaǵy qyzym bar edi. Kúıeýim bul ýaqytta Qaraǵandydan kele jatqan. Qansha ýaqyttyń ótkenin bilmeımin... Birazdan soń úıge polıtsııa qyzmetkeriniń kirip kele jatqanyn baıqadym. Polıtsııany shaqyrmaǵan edim, sondyqtan tańǵalyp qarap qalyppyn. Quqyq qorǵaýshy bárimizdi tynyshtandyryp, eshqandaı qorǵaıtyn kıimsiz bizdi syrtqa alyp shyqty. Sol kúndi oılasam áli kúnge deıin janym túrshigedi. Tártip saqshysyna alǵysymdy qalaı bildirerimdi bilmeımin. Dinmuhamed sekildi polıtseıler kóp bolsa degen tilegim bar. Onyń qaısarlyǵy men kásibıliginiń arqasynda biz qaýipten aman qaldyq. Onyń áriptesi de ratsııa arqyly jaǵdaıdyń bárin baqylaýynda ustap otyrdy. Biz osy eki polıtsııa qyzmetkerine kóp rahmet aıtamyz», - dedi Janar Sádýaqasqyzy.
Órt kezinde qaısarlyq tanytqan polıtsııa qyzmetkerleriniń esimi – Nur-Sultan qalalyq Polıtsııa departamenti patrýldik polıtsııanyń polk qyzmetiniń ınspektory, aǵa leıtenant Dinmuhamed Masadyqov pen aǵa leıtenant Ernar Aqanov.
«Úıde kishkentaı búldirshinniń baryn bilgen kezde eń aldymen sony qutqarýdy oıladym. Sebebi, eresek adamdar kók tútinge shydas bergenimen, sábı ony kótere ala ma!? Qolymnan kelgeniniń bárin jasadym. Bári sátti aıaqtalǵanyna qýanyshtymyn», - dedi Dinmuhamed.
