Nur-Sultanda páterler tek kezek boıynsha beriledi – ákimniń keńesshisi
NUR-SULTAN. QazAqparat – Elordada kezekten tys páterler berilmeıdi. Bul týraly qala ákiminiń keńesshisi Elnur Beısenbaev aıtty, dep habarlaıdy QazAqparat.
E.Beısenbaevtyń sózinshe, messendjerlerde Nur-Sultan qalasynda páterler kezeksiz berilip jatqany týraly aqparat taraǵan. Biraq ol - shyndyqqa janaspaıdy.
«Kezeksiz páter berý qarastyrylmaǵan. Áleýmettik baspana kezekte turǵan azamattarǵa zań sheńberinde jáne tek kezek boıynsha beriledi», - delingen taratylǵan málimette.
Elorda ákimdiginiń aqparatyna sáıkes, aǵymdaǵy jyldyń aqpan aıynda memlekettik organdar men turǵyndar arasynda kommýnıkatıvti vakkým qalyptasty. Bul máseleni sheshý úshin qalalyq ákimshilik qoǵamdyq qabyldaýlardyń qyzmet sapasyn jaqsartýǵa múmkindik beretin kontseptýaldy sharalardy qabyldady. Onymen qosa, búgingi tańda ákimdiktiń negizgi qyzmeti – halyqpen keri baılanysty nyǵaıtyp, azamattyq qoǵammen tolyqqandy ózara baılanys ornatýǵa baǵyttalǵan. Máselen, elordada áleýmettik jelilerde «keri baılanys» ornatylyp, «Januıa» jáne iKomek ortalyqtary jumys ister tur. Budan bólek, ákimdik janynda qoǵamdyq qabyldaý tıimdi qyzmet atqarýda.
«Aǵymdaǵy jyldyń maýsym aıynan bastap ár apta saıyn qala ákimi, onyń orynbasarlary, aýdan ákimderi men memlekettik organdar basshylary turaqty túrde azamattardy qabyldaıdy. Atap aıtqanda, ákimniń qoǵamdyq qabyldaýy óz jumysyn bastaǵan 29 maýsymnan búginge deıin A.Kólginov 500-den astam turǵyndy qabyldady. Onda 1347 ótinim boıynsha másele kóterilip, 89% keshiktirilmeı sheshimin tapty. Sondaı-aq orynbasarlary 1,4 myńnan asa, aýdan ákimderi men basqarma basshylary 2,5 myńnan asa elorda turǵynyn qabyldady», - dedi E.Beısenbaev.
Turǵyndardan túsetin máselelerdiń kóbi turǵyn úı, bilim, nesıelik qaryzyn óteý, densaýlyq saqtaý, jumyspen qamtý, materıaldyq kómek, abattandyrý, TKSh, joldarǵa qatysty.
Ekinshiden, «Januıa» otbasyn qoldaý ortalyǵy 70-ten asa memlekettik qyzmetti biriktirip, «bir tereze» qaǵıdasy boıynsha azamattarǵa kómek kórsetedi. Ashylǵan kúnnen bastap oǵan 4,5 myńnan asa adam júginip, 8,5 myń másele kóterdi. Onyń 6,5 myńy boıynsha júıeli konsýltatsııalar berilip, 2 myńǵa jýyǵy sheshimin tapty.
Úshinshiden, aýdan ákimdikterimen «Open Akimat» prıntsıpi engizildi. Sonyń sheńberinde ashyq esik kúnderi ótkizilip, elordanyń 1 myńnan astam turǵyny qatysty.
