Nur-Sultanda para paýerlıftıngten álem chempıonaty bastaldy
QR Mádenıet jáne sport mınıstri Aqtoty Raıymqulova mundaı sport saıysy elimizde tuńǵysh ret ótip jatqanyn aıtady.
«Bul chempıonat Tokıodaǵy 2020 jyly ótetin paralımıada oıyndaryna joldama taratatyn aqtyq saıys bolmaq. Mundaı birinshilik elimizde alǵash ret ótip otyr. Oǵan álemniń 76 elinen úmitkerler qatysady. Bizdiń elde múmkindigi shekteýli jandardyń sportpen aınalysýyna barynsha jaǵdaı jasalyp jatyr. Nur-Sultan qalasynda Elbasy Nursultan Nazarbaevtyń qatysýymen tuńǵysh Paraalımpıadalyq jattyǵý ortalyǵy ashylǵan bolatyn. Jazǵy jáne qysqy paralımpıadalyq sport túrlerinen sporttyq rezervtegi ulttyq quramanyń músheleri syndarly saıystarǵa osy ortalyqta daıyndalyp júr. Jalpy elimizde para paýerlıftıngpen 600-den astam adam aınalysady», - dedi mınıstr chempıonattyń ashylý saltanatyna oraı ótken baspasóz-konferentsııasynda.
Osymen segizinshi ret ótip jatqan álem chempıonatyna para paýerlıftıngte juldyzy janǵan áıgili sportshylardyń barlyǵy derlik kelipti. Solardyń arasynda úsh dúrkin paralımıada chempıony, Mysyr eliniń sportshysy Osman Sherıf te bar.
«Alǵash sportqa bet burǵanda barlyq týystarym men jaqyndarym qarsy bolǵan. «Tekke áýre bolasyń, odan keler paıda joq da bolǵan» dep keńes bergende de bolǵan. Men olaı emes ekenin isimmen dáleldep júrmin. Eger oılanyp qarasaq, jer betindegi barlyq adamnyń múmkindigi shekteýli dep oılaımyn. Nemese barlyǵnyń múmkindigi birdeı deý kerek shyǵar. Múmkindigimiz shekteýsiz bolsa, álem mundaı bolmas edi. Barlyq qalaýymyz oryndalar edi ǵoı. Meniń bala kúnimde dáriger bolsam degen armanym bolǵan. Biraq oqýǵa moınym jar bermedi. Sondyqtan sportty tańdadym. Jattyǵýdan qalmaı, bar jigerimdi jumsap edim, nátıje bere bastady. Sporttyń arqasynda álemdi aralap, tabys tabamyn. Úsh birdeı paralımpıadalyq oıyndarǵa qatystym. Sondyqtan aldyńa anyq maqsat qoıa bilý kerek. Sonda shekteýli múmkindigińniń aıasy keńeıe túsedi», - dedi ol.
Qazaqstandyq sportshylar atynan Brazılııadaǵy paralımpıada oıyndarynyń kúmis júldegeri Raýshan Qoıshybaeva sóz alyp, barlyq qatysýshylarǵa sáttilik tiledi.
«Bul sport maǵan ómirdegi qıyndyqtardyń barlyǵyn jeńýge kómektesti. Para paýerlıftıng meniń ómirimniń mánine aınaldy. Biz sııaqty sportshylarǵa jan-jaqty qoldaý kórsetip jatqan memleketimizge alǵys aıtqym keledi», - dedi qazaqstandyq sportshy.
Ulttyq paralımpıada komıtetiniń tóraǵasy Qaırat Boranbaev jarysty uıymdastyryp, ótkizýge eriktilerdiń belsendi atsalysyp jatqanyn erekshe atady.
«Chempıonat QR Mádenıet jáne sport mınıstrliginiń tikeleı qoldaýymen ótip jatyr. Degenmen, eriktilerdiń belsendi kómektesip jatqanyn aıtýymyz kerek. Kásipkerlik nysandary da, qyzmet kórsetý oryndary da sharanyń sıpatyn bilgennen keıin kómek qolyn soza bildi. Búgingi sharany ótkizýge ǵımarat usynyp otyrǵan «EKSPO» ortalyǵyna da alǵysymyz sheksiz», - dedi komıtet tóraǵasy.
foto: vksport.kz
