Nur-Sultanda ózin órtegen áıeldiń jaǵdaıy aýyr

NUR-SULTAN. QazAqparat – Elordada ishki ister mınıstrligi ǵımaratynyń aldynda ózin órtegen áıeldiń qazirgi jaǵdaıy belgili boldy, dep habarlaıdy QazAqparat tilshisi Nur-Sultan qalalyq qoǵamdyq densaýlyq saqtaý basqarmasynyń baspasóz qyzmetine silteme jasap.

«1990 jyly týǵan áıel denesiniń keıbir bólikterin kúıik shalǵan. Jedel járdem zardap shegýshini № 1 kópbeıindi qalalyq aýrýhanaǵa jetkizdi. Patsıent shokqa qarsy palataǵa jatqyzylyp, ony kombýstıolog, reanımatolog, toksıkolog, terapevt mamandar qarap shyqty. Naýqastyń jaǵdaıynyń aýyrlyǵyn eskere otyryp, ol kúıik shogy, kúıiktiń aýdany men jaraqattyń tereńdigi aıtarlyqtaı bolǵandyqtan reanımatsııa bólimine jatqyzyldy», - delingen habarlamada.

Densaýlyq saqtaý basqarmasynyń málimetinshe, qazir patsıentke tolyqqandy medıtsınalyq kómek kórsetilip jatyr.

«Naýqas OARIT qyzmetkerleriniń baqylaýynda. Onyń densaýlyq jaǵdaıy áli de aýyr dep baǵalanyp otyr», - deıdi vedomstvodan.

Buǵan deıin Nur-Sultan qalasynda ózin órtegen áıeldiń aýrýhanaǵa jatqyzylǵanyn habarlaǵan edik.

Keıin Almaty polıtsııasy ózin órtegen áıel aıyptaǵan qarjy pıramıdasyna qatysty túsinik berdi.