Nur-Sultanda ótip bara jatqan adamdy tonaǵan ury ustaldy
NUR-SULTAN. QazAqparat - Polıtsııaǵa qala turǵyny kóshede belgisiz bireý shabýyl jasap, uıaly telefonyn tartyp alǵany týraly aryzdanǵan, dep habarlaıdy QazAqparat.
Anyqtalǵandaı, jas jigit túngi ýaqytta, saǵat 23.00 shamasynda Esenberlın kóshesimen kele jatyp, uıaly telefonmen sóılesken. Osy ýaqytta kúdikti oǵan jaqyndap kelip, áldebireýge qońyraý shalýdy ótingen.
«Jas jigit onyń ótinishinen bas tartqan. Jaýap retinde qaskúnem onyń jaq tusynan uryp, quny 100 myń teńge turatyn telefonyn tartyp alyp, qashyp ketken. Polıtsııa qyzmetkerleri urlyq jasaǵany úshin buryn sottalǵan 34 jastaǵy kúdiktini «izin sýytpaı» ustady», - dep jazdy elordalyq polıtsııa departamentinen.
Qazirgi ýaqytta tonaý faktisi boıynsha sotqa deıingi tergeý júrgizilýde. Ustalǵan azamattyń qala aýmaǵynda jasalǵan basqa da uqsas qylmystarǵa qatystylyǵy tekserilýde. Kúdikti ýaqytsha ustaý ızolıatoryna qamaldy.
