Nur-Sultanda otbasylyq-turmystyq qylmystar kóbeıgen
NUR-SULTAN. QazAqparat – Jyl basynan beri elordada turmystyq qylmys úshin 900 adam jaýapqa tartyldy, dep habarlaıdy QazAqparat tilshisi.
Bul týraly Nur-Sultan qalasy Polıtsııa departamenti Áıelderdi zorlyq-zombylyqtan qorǵaý bólimshesiniń aǵa ınspektory Gúlmıra Shrahmetova aıtyp berdi.
«Jyl basynan beri 9 aıda qylmystardyń tirkelý sany 37,1 paıyzǵa tómendegenin baıqadyq. Іs júzinde barlyq túrler boıynsha qylmystardyń tómendeýi baıqalady. Profılaktıkalyq jumysty kúsheıtý nátıjesinde qoǵamdyq oryndardaǵy qylmys – 53,9 paıyzǵa, kóshelerde – 53,7 paıyzǵa, mas kúıinde qylmys jasaý – 37,7 paıyzǵa tómendegen. 10 myń turǵynǵa shaqqanda qylmys deńgeıi 40,2% azaıǵan. Alaıda, jasalǵan barlyq sharalarǵa qaramastan otbasylyq-turmystyq qylmystar 4 paıyzǵa artqan», - dedi G. Shrahmetova Polıtsııa departamentinde ótken baspasóz máslıhatynda.
Onyń aıtýynsha, kóp jaǵdaıda áıelder tán jaraqaty boıynsha polıtsııaǵa júginedi.
«Pandemııa jaǵdaıynda halyqtyń ómir salty túbegeıli ózgerdi, áleýmettik qarym-qatynas azaıyp, materıaldyq jaǵdaıdyń nasharlaýy adamdardyń psıhologııalyq jaǵdaıyna teris áser etti. Іshimdik ishý saldarynan otbasylyq shıelenister týyndady. Biz esepke alynǵan adamdarmen – maskúnemder (1009 adam), nashaqorlar (370 adam), otbasylyq janjal shyǵarýshylarmen (5917 adam) profılaktıkany kúsheıttik. Alkogol men esirtkige táýeldilikten májbúrlep emdeý jumystaryn jalǵastyrýdamyz», - dep túsindirdi departament ókili.
Departament málimetterine sáıkes, turmystyq qylmys úshin 920 adam jaýapqa tartylǵan.
«Jábir kórgenderdi qorǵaý úshin 5 917 nusqama shyǵaryldy. 260 áıel daǵdarys ortalyqtaryna ornalastyryldy. Qorǵaý talaptaryn buzǵany úshin 147 adam jazalandy», - deıdi G. Shrahmetova.
