Nur-Sultanda Olımpıada kúni atalyp ótti
Qazaqstan Ulttyq Olımpıada komıteti maýsym aıyn tutastaı olımpıadalyq qundylyqtarǵa arnady. Bul aı halyqaralyq jáne Qazaqstan olımpıadalyq qozǵalysynyń «Biz birgemiz! Tezirek, bıigirek, myqtyraq – birge» uranymen ótti.
3h3 basketbol, strıtbol, strıt-vorkaýterler men kanoeshiler jáne tekbol – bul salystyrmaly túrde sporttyń jańa túrleri, fýtbol men ústel tennısiniń gıbrıdi sanalady. Tekboldy oılap shyǵarǵan komanda jańa sport túrin olımpıada baǵdarlamasyna engizýge tyrysýda. Odan bólek, elordanyń eń jas turǵyndaryna arnap Tokıo-2020 Olımpıadsyna joldama ıegerleri, ulttyq qurama músheleri Kırıll Gerasımenko men Anastasııa Lavrova sheberlik sabaǵyn ótkizdi.
«Barshańyzdy Halyqaralyq Olımpıada kúnimen quttyqtaımyn! Olımpıada oıyndarynyń bastalýyna bir aı qalǵanyn eskersek, bul shynymen de mańyzdy mereke. Olımpıadany bir jylǵa shegergennen keıin bul oıynǵa qatysý múmkindigin alý men úshin úlken qýanysh. Al Olımpıadada Anastasııa Lavrovanyń da baq synaıtyny qýanyshymyzdy eseleı túsedi. Osyndaı is-sharaǵa qatysyp, kishkentaı sportshylardyń qyzyǵýshylyǵyn kórgenime qýanyshtymyn!», - dep quttyqtady Kırıll Gerasımenko.
Qazsport telearnasy Olımpıada kúnine tikeleı efırin arnap, elordadaǵy ýrban-festıvaldi, qurama komandanyń Tokıoǵa daıyndyǵyn jáne aımaqtardaǵy sıýjetterdi el nazaryna usyndy. Tokıo Olımpıadasynyń bastalýyna týra bir aı qalǵanda ótkizilgen merekeni el turǵyndary tikeleı efırden tamashalady.
«Men kún saıyn jattyǵamyn. Jaz kezinde de jattyǵýdy toqtatpaımyn. Bizdiń óz komandamyz bar, aýlalar bolyp jarysamyz. Bizdiń sportshylardyń Olımpıadadaǵy ónerin bárimiz de tamashalaımyz. Men boksshylarǵa, Vasılıı Levıtke jankúıermin», - dedi jas basketbolshy Medet Tólenbaev.
Bes olımpıada shyǵyrshyǵy bes qurlyqty bildiretini sekildi, merekelik estafetany ótkizýge elimizdiń bes aımaǵy atsalysty. Olar qazaqstandyqtardyń belsendi bolyp, sport týraly jańa dúnıelermen tanysýyna, óz múmkindikterin arttyrýyna sebepker boldy.
Jaqynda Almatyda quzǵa órmeleýshiler arasynda jarys ótse, Petropavlda Olımpıada chempıony Aleksandr Vınokýrovtyń qatysýymen velojarys boldy, Óskemende Olga Rypakovanyń qatysýmen jeńil atletıkalyq jarystar uıymdastyrylsa, Aqtaýda Ádilbek Nııazymbetov pen Aıbek Imashev boks jáne dzıýdodan sheberlik sabaǵyn ótkizdi.
«Barshańyzdy Halyqaralyq Olımpıada kúnimen quttyqtaımyn! Bul qozǵalysqa kóptegen elderdiń qatysatyny jaqsy. Olımpıadalyq kóńil-kúı búkil jaz boıy sezilip tursa eken. Sebebi sportshylar Tokıǵa attanady. Bizder, olımpıadashylar, barsha qazaqstandyqtardy sportshylardy qoldaýǵa shaqyramyz. Olımpıadada sizderdiń qoldaýlaryńyz bizge asa qajet», - dedi Rıo Olımpıadasynyń júldegeri, boksshy Vasılıı Levıt.
16 shilde kúni komandanyń alǵashqy bóligi Tokıoǵa attanady. Al ázirge olımpıadashylar men chempıondar balalarmen jáne jastarmen kezdesedi. Sportshylar qazaqstandyqtardyń patrıotızmdi, sport pen densaýlyqty tańdaıtynyna senimdi.
Esterińizge sala keteıik, qazirgi tańda Qazaqstan sportshylary Tokıo Olımpıadasyna sporttyń 26 túrinen 72 joldama jeńip aldy.
