Nur-Sultanda Meıkaton TOM jobalar marafony ótedi
NUR-SULTAN. QazAqparat - Elordada «Múmkindigi shekteýli jandarǵa arnalǵan prototıpter men gadjetterdi oılap tabý» atty meıkaton marafony ótedi, dep habarlaıdy QazAqparat tilshisi.
Uıymdastyrýshylardyń málimetinshe, 13-16 qarasha kúnderi ótetin sharada jas ónertapqyshtar erekshe kútimdi talap etetin jandardyń ómirin jeńildetýge arnalǵan tehnologııalyq týyndylaryn tanystyrady. Sonyń ishinen úzdik degeni tańdalyp, ıdeıa júzege asyrylatyn bolady.
«Meıkaton jobasy tek múmkindigi shekteýli jandarǵa kómektesip qoımaı, óz ıdeıalaryn júzege asyramyn deýshiler úshin taptyrmas alań. Qalalyq ákimdiktiń qoldaýymen ótken atalǵan sharaǵa 7 komanda qatyssa, bıyl onyń sany 10-ǵa jetip otyr. Taǵy bir aıta ketetin sát, ótken jylǵy 7 jobanyń 2-i naqty qoldaý taýyp, júzege asyryldy. Bul adam ómirin jeńildetý men jetildirý jolyndaǵy taptyrmas joba deýge bolady. Osy shara arqyly jastar óz ıdeıalaryn júzege asyrýǵa múmkindik alýmen qatar, ózara tájirıbe almasady. Sondyqtan da bizdiń ortalyq osy sekildi paıdaly jobalardy qoldaýǵa árqashanda daıyn», - dedi Nur-Sultan qalasy ákimdigi «Astana jastary» resýrstyq ortalyǵy basshysynyń orynbasary Aıan Ermentaev sharanyń uıymdastyrylýyna oraı ótken onlaın baspasóz máslıhatynda.
Aıta ketsek, Meıkaton (Makeathon) TOM 72 saǵattyq tyń jobalar men ıdeıalar marafony.
